Владивостокка Го оонньууга 41-с төгүлүн ыытыллыбыт аан дойду чөмпүйэнээтэ түмүктэннэ.
Күрэхтэһии бэс ыйын 3-9 күннэригэр Уһук Илин федеральнай университетын кампуһугар ыытылынна.
Чөмпүйэнээти тэрийиигэ Уһук Илин уокуругар Саха сирин бастайааннай бэрэстэбиитэлистибэтэ көхтөөхтүк кытынна диэн иһитиннэрэллэр.
Күөн күрэскэ Саха сирин сүүмэрдэммит хамаандата тиийэн, Арассыыйа кубогар бастыыр иһин уонна чөмпүйэнээт дьыалабыай бырагырааматыгар кытынна. Тэрээһин дьыалабыай бырагырааматыгар СӨ Го Федерациятын бэрэсидьиэнэ Александр Егоров, «Алмазэргиэнбаан» Бырабылыанньатын бэрэссэдээтэлэ Николай Долгунов, СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров уонна Уһук Илиҥҥэ Саха сирин бастайааннай бэрэстэбиитэлин солбуйааччы Вадим Николаев кыттыыны ыллылар.
Пленарнай сиэссийэҕэ уонна кэпсэтиигэ «гибриднэй интеллект» систиэмэтин тэрийии, компьютер оонньууларын индустриятын сайыннарыы туһунан, уо.д.а. боппуруостары ырыттылар. Маны сэргэ, дьыалабыай быраграама кыттыылаахтара «Росгеология» генеральнай дириэктэрэ Сергей Горьковы, Polymetal сүрүн толорооччу дириэктэрин Виталий Несиһи уонна да атын былаас, биисинэс, аан дойду таһымнаах хампаанньалар бэрэстэбиитэллэрин кытары көрүстүлэр.
Александр Егоров Саха сирин хамаандата күүстээх утарылаһааччылары кытары дьоһуннук киирсибитин бэлиэтээтэ. Сүүмэрдэммит хамаанда чилиэнэ Виктор Павлов: «Бу аан бастакы кыттыыга хамаанда үчүгэйдик кытынна. Арассыыйаҕа бэһис миэстэ, тус зачекка сүүрбэ иһигэр киирдибит. Маннык тэрээһиннэр Го оонньуутугар дьону угуйаллар, көҕүлүүллэр. Онон күрэхтэһиилэр сотору-сотору ыытыллалларыгар эрэнэбит«, — диэтэ. Хамаанда кыттыылаахтара, маны сэргэ, Владивостокка үрдүк үөрэх кыһаларыгар үөрэнэр устудьуоннары кытары көрүстүлэр, чөмпүйэнээт түмүгүн дьүүллэстилэр, экскурсиялаатылар.
Чөмпүйэнээт иитинэн атын интэриэһинэй тэрээһиннэр эмиэ ыытылыннылар. Ол курдук, куорат олохтоохторугар уонна ыалдьыттарга «Genius Extreme» Го аан дойдутааҕы бэстибээлэ, «Тигриная почта» бырайыак биһирэмэ буолла. Биһирэм туһунан сырдаттахха, почта салааларыгар Кыһыл кинигэҕэ киирбит кыыл ойуулаах аккырыыккалар атыыланаллар. Бу атыыттан киирбит харчы Приморье кыраайын үүнээйилэри, кыыллары көрөр-харайар тыытыллыбат сиригэр (заповедникка) наадалаах, туһалаах тэрили ыларга ыытыллар.
Саха сиригэр Го оонньууну сайыннарыыны Саха Өрөспүүбүлүкэтин салалтата өйүүр. Ил Дархан Айсен Николаев аан дойдуга Го оонньуу чөмпүйэнээтин тэрийэр кэмитиэтигэр баар.
Го оонньуу толкуйдуур дьоҕуру эрчийэр, сайыннарар. Быраабылалара судургулар уонна аҕыйах мүнүүтэ иһинэн үөрэтиэххэ сөп. Өссө биир үчүгэйэ, «Игры разумов» саайтка эбэтэр араас сыһыарыылары хачайдаан ылан баран онлайн оонньуохха эмиэ сөп. Бу оонньууну аан дойдуга сэҥээрэллэр, сэргииллэр.
+1
+1
+1
+1
+1
+1
+1