Бэҕэһээ Владивостокка VII Норуоттар икки ардыларынааҕы «Азия оҕолоро» спортивнай оонньуулар саҕаланнылар. Оонньуулар үөрүүлээх арыллыылара «Фетисов-арена» успуорт комплексыгар буолла. Манна 12 дойдуттан уонна Арассыыйа аҕыс хамаандатыттан 1500 оҕо илин-кэлин түсүһүөҕэ. Саха сирин сүүмэрдэммит хамаандатыгар 120 спортсмен уонна 50 тириэньэр баар. Оҕолорбут успуорт 18 көрүҥэр күрэхтэһиэхтэрэ.
Оонньуулар үөрүүлээх арыллыыларыгар көҥүл тустууга олимпийскай чөмпүйүөн Павел Пинигин кытынна. Онтон 1500 кыттааччы парааттаан киирдэ. Судьуйалар парааттарын «Азия оҕолорун» кылаабынай судьуйата Татьяна Горбунова салайда. РФ Бэрэсидьиэнин Владимир Путин аатыттан кини көмөлөһөөччүтэ Игорь Левитин эҕэрдэ тыл эттэ.
«Бу оонньуулар киэҥник билиннилэр, күүстээх-уохтаах, талааннаах оҕолор, физкултуураны, көхтөөх уонна чөл олоҕу өрө тутар дьон күрэхтэһэр былаһааккаларынан буолла. Манна кыттыбыт оҕолор оонньуулартан кынаттанан улахан успуорка ситиһиилэнэллэрэ, аан дойдутааҕы күрэхтэһиилэргэ кытталлара үөрдэр. Биллэн турар, бу күрэхтэһиилэр олимпизм соруктарын сайыннарар, норуоттар икки ардыларынааҕы сыһыаны олохтуур, доҕордуу буолууну саҕар сыаллаахтар. Быйылгы оонньуулар ситиһиилээхтик, чиэһинэйдик, интэриэһинэйдик уонна араас култуурунай бырагыраамалаахтык ааһалларыгар эрэнэбин», — диэн Игорь Левитин эттэ.
РФ Успуорка миниистирэ Олег Матыцин РФ вице-премьерин Дмитрий Чернышенко эҕэрдэтин маннык тириэртэ:
«Онньуулар устуоруйалара 26 сыл аннараа өттүгэр саҕаламмыта, бу кэм устата мантан аан дойдутааҕы таһымнаах успуорт «сулустара» таҕыстылар. Бу күрэхтэһиилэргэ биһиги бастакыбытын олимпийскай чөмпүйүөн буолар дьылҕалаах спортсменнарбыт ааттарын истибиппит: дзюдоист Арсен Галстян, спортивнай гимнастка Лилия Ахаимова, ытааччы Виталина Бацарашкина. РФ бэрэсидьиэнин өйөбүлүнэн биһиги дойдубут сиригэр-уотугар арассыыйатааҕы уонна норуоттар икки ардыларынааҕы таһымнаах күрэхтэһиилэри ыытабыт. Биһиги доҕордуу дойдуларбыт «Азия оҕолоругар» кыттарга сөбүлэспиттэригэр махтанабыт. Бу күрэхтэһиилэр аан дойдуга успуорт ситимниир күүһэ баарын биллэрэллэр».
Оттон «Азия оҕолоро» ноуроттар икки ардыларынааҕы кэмитиэт бэрэсидьиэнэ Владимир Максимов пандемия мэһэйдэтээр даҕаны, Приморскай кыраай оонньуулары үрдүк таһымнаахтык тэрийбитин бэлиэтээтэ. «Саха сиригэр төрүттэммит оонньуулар билигин араас дойдуттан тыһыынчанан оҕону түмтэ. Биһиэхэ күүстээх уонна бары өттүнэн сайдыылаах, кыайыыга дьулуурдаах, утарылаһааччыларын ытыктыыр эрэ буолбакка, култууралары билэр, норуоттар устуоруйаларын сыаналыыр киһини иитэн таһаарарбыт улахан суолталаах», — диэн бэлиэтээтэ.
Итиэннэ Арассыыйа Олимпийскай кэмитиэтин бэрэсидьиэнэ Станислав Поздняков кыттааччылары эҕэрдэлээтэ уонна оонньуулар сүрүн соруктарынан доҕордоһуу, кэрэҕэ, сырдыкка дьулуһуу, талаһыы буоларын бэлиэтээтэ.
«Азия оҕолоро» үөрүүлээх арыллыыта былааҕы күөрэччи көтөҕүүнэн түмүктэннэ. Былааҕы ааттаах-суолаах спортсменнар, ол иһигэр буоксаҕа бастакы оонньуулар чөмпүйүөнэ, 2008 сыллааҕы Пекиҥҥэ ыытыллыбыт Олимпиада боруонса призера Георгий Балакшин, көҥүл тустууга бастакы оонньуулар чөмпүйүөнэ, Азия чөмпүйүөнэ, аан дойду боруонса чөмпүйүөнэ, икки Олимпиада кыттыылааҕа Леонид Спиридонов бааллар.
Салгыы театрализованнай туруорууну көрдөрдүлэр. Манна оонньуулар устуоруйаларын, Саха сирин номохторуттан уонна үгэстэриттэн быһа тардан, Саха АССР төрүттэниитин бар дьоҥҥо билиһиннэрдилэр. Арыллыыга Саха сирин кэлэктииптэрин отучча оҕото кыттыыны ылла.
Оонньууларга успуорт 19 көрүҥэр 273 мэтээл кэмпилиэгэ оонньонуоҕа.
Бырагырааманы сиһилии манна көрүҥ.
СИА.
Андрей Сорокин хаартыскалара.