Владислав Андреев, Ньургун Скрябин төрөөбүт күннэригэр Европа түһүлгэтигэр тустуохтара

Бүгүҥҥүттэн Каспийскай куоракка ыытылла турар Европа чөмпүйэнээтигэр көҥүл тустууга күрэхтэһии саҕаланар. Бастакынан көбүөргэ 57, 65, 70, 79 уонна 97 киилэлээх бөҕөстөр тахсыахтара.

edersaas.ru

Саамай чэпчэки ыйааһыҥҥа Белоруссия аатыттан тустар биир дойдулаахпыт, норуоттар икки ардыларынааҕы кылаастаах спорт маастара Владислав Андреев бастаан Турция бөҕөһө, ыччаттар ортолоругар аан дойдутааҕы күрэхтэһиилэр хас да төгүллээх кыайыылаахтара Ахмет Пекеры кытта күөн көрсүөҕэ. Хапсыһыыны бэйэтин туһугар түмүктээтэҕинэ, салгыы Армен Аракелян (Украина) — Иван Замфиров (Молдова) көрсүһүүлэрин кыайыылааҕын кытта тустуоҕа. Владислав ыйааһыныгар Европа чөмпүйүөнэ Георгий Эдишерашвили (Азербайджан), Европа чөмпүйэнээтин призера Андрей Дуков (Румыния), уопуттаах бөҕөс Мигран Джабурян (Армения) бааллар. Манна Арассыыйа чиэһин Заур Угуев көмүскүөҕэ. Хапсыһыылар Дьокуускай бириэмэтинэн киэһэ 17-00 чаастан саҕаланыахтара.

Сарсыҥҥыттан, ыам ыйын 5-тэн, саха тустууга оскуолатын өссө биир иитиллээччитэ Ньургун Скрябин эмиэ Белоруссия былааҕынан 61 киилэҕэ диэри ыйааһыҥҥа тустуоҕа.

Манна бэлиэтээн эттэххэ, Владиславтаах Ньургун төрөөбүт күннэригэр Европа көбүөрүгэр тахсыахтара: ыам ыйын 4-гэр Владислав — 31, ыам ыйын 5-гэр Ньургун 28 саастарын туолуохтара.

Роман Попов, “Саха сирэ” хаһыат, edersaas.ru