«Саха сирин киэн туттуута – 2019» норуот бириэмийэтигэр «Тыа сирин үлэһит киһитэ» номинацияҕа кыайыылаахтары быһаарыы бастакы түһүмэҕэ муус устар 18 күнүгэр буолбутун туһунан биһиги эрдэ суруйан турабыт.
edersaas.ru.
«Сахамедиа» холбоһук тэхиньиичэскэй сулууспатын хонтуруолун ааһан, саамай элбэх куолаһы ылбыт биэс киһи: сир ууһа Владислав Мордовской (Уус Алдан), үрүҥ илгэни үрүлүтэр Илья Дьячковскай (Чурапчы), 48-с сылын суоппардыыр Меркурий Яковлев (Ньурба), Дьөһөгөй оҕото куттаах Анатолий Баишев (Амма), өрөспүүбүлүкэ биир бастакы бааһынайа Анастасия Кырбасова (Бүлүү) финалга тахсыбыттара. Муус устар 26 күнүгэр таһаарыллыбыт түмүк быһыытынан, 11 тыһыынча 184 куолаһы ылан, Владислав Мордовской тыа сирин бастыҥ үлэһитин аатын ылла!
Кыайыылааҕы чиэстээһин бүгүн, «Сахамедиа» холбоһук медиа-киинигэр тэрилиннэ. Холбоһук генеральнай дириэктэрэ Алексей Чертков кыайыылааҕы эҕэрдэлииригэр аныгы олох хаамыытынан, куоластааһыҥҥа интернети туһаныы киэҥ кыаҕы биэрэр, манна биир улуус дьоно эрэ буолбакка, өрөспүүбүлүкэ олохтоохторо бары итиэннэ атын эрэгийиэннэр кытары кытталлар, чулууттан чулуулары талаллар диэтэ.
Тыа хаһаайыстыбатын миниистирин солбуйааччы Николай Афанасьев үлэ киһитин бар дьон билиитигэр таһаарар, кинилэри инники күөҥҥэ тутар маннык дьаһалы тэрийбитин иһин «Сахамедиаҕа» махтанна, номинацияҕа кыттыбыт, финалга тахсыбыт дьоннор бары өрөспүүбүлүкэҕэ биллэр-көстөр, бэйэлэрэ дьоруойга тэҥнээх үтүө үлэһит буолалларын бэлиэтээтэ. Владислав Семенович сыллата 190 т хортуоппуйу, 280 т хаппыыстаны, 30 т араас оҕуруот аһын хомуйан, дьону-сэргэни экологическай ыраас аһынан-үөлүнэн хааччыйар, өрөспүүбүлүкэ биир бастыҥ оҕуруотчута буолар диэтэ.
Уус Алдан улууһун дьаһалтатын баһылыгын солбуйааччы Петр Попов, улуус кылаабынай агронома Прокопий Белолюбскай итиэннэ Иркутскайдааҕы тыа хаһаайыстыбатын институтугар бииргэ үөрэммит доҕотторо, биир идэлээхтэрэ эҕэрдэлээтилэр. Владислав Мордовской сыралаах, үтүө суобастаах үлэтин үрдүктүк сыаналаатыгар, улуус дьаһалтата кини хаһаайыстыбатын базатыгар оройуоннаммыт хортуоппуй сиэмэтин таһаарар анал хаһаайыстыбаны тэрийэр былааннааҕын билиһиннэрдэ.
– Владислав Семенович аҕата Семен Семенович Мордовскай Үлэ Кыһыл знамята уордьан кавалера, Уус Алдан улууһун Бочуоттаах олохтооҕо, сопхуос саҕана хаппыыста уонна хортуоппуй өлгөм үүнүүтүн хомуйан, Котрус, Иванов курдук өрөспүүбүлүкэ бастыҥ мэхэньисээтэр-оҕуруотчуттарын кытары көҕүтүһэн үлэлээбитэ. Онон, Владислав сир үлэтин оҕо эрдэҕиттэн билэр, агроном үрдүк үөрэҕин бүтэриэҕиттэн сүүрбэ сэттис сылын сиртэн илиитин араарбакка үлэлиир. Аҕа көлүөнэ үлэҕэ үгэһин дьоһуннук салгыыр. Быйылгы биһиэхэ үгүс үөрүүнү тохсойдо: Суотту орто оскуолатын учуутала өрөспүүбүлүкэ бастыҥ учууталын аатын ылла, биир бастыҥ тустуукпут көҥүл тустууга Аан дойду кубогын тутта итиэннэ «Тыа сирин үлэһит киһитэ» номинация хаһаайыннынан Суотту оҕуруотчута буолла! – диэтэ Суотту нэһилиэгин баһылыга Василий Иванов.
– Бу кыайыы миэхэ улахан эппиэтинэһи үөскэтэр, – диэтэ түмүк тылы этэригэр Владислав Мордовской. – Номинацияҕа кыттар сайаапканы олохтоох дьаһалта ыыппыта, бэйэм да билбэккэ хаалбытым, биир дойдулаахтарым, кэргэним уонна оскуолаҕа, институкка бииргэ үөрэммит оҕолорум, биир идэлээхтэрим өрөспүүбүлүкэ таһыттан кытары дьулуһан туран куоластааннар, бастаан финалга тахсыбытым, онтон кыайыылаах буоллум. Махтанабын! Маннык үрдүк аакка тиксибит киһи дьон эрэлин түһэн биэрбэт курдук үлэлээтэхпинэ табыллар.
Раиса Сибирякова, «Саха сирэ», edersaas.ru