Владислав Андреев Европа чөмпүйэнээтигэр бастакы хапсыһыытыгар Турция бөҕөһүн кыайда

Каспийскай куоракка ыытылла турар Европа чөмпүйэнээтигэр көҥүл тустууга күрэхтэһии саҕаланна. Бүгүн Дьокуускай бириэмэтинэн 17-00 чаастан көбүөргэ 57, 65, 70, 79 уонна 97 киилэлээх бөҕөстөр таҕыстылар.

edersaas.ru

Саамай чэпчэки ыйааһыҥҥа Белоруссия аатыттан тустар биир дойдулаахпыт, норуоттар икки ардыларынааҕы кылаастаах спорт маастара Владислав Андреев бастакы хапсыһыытыгар Турция бөҕөһүн, ыччаттар ортолоругар аан дойдутааҕы күрэхтэһиилэр хас да төгүллээх кыайыылаахтарын Ахмет Пекеры 6:2 ахсаанынан кыайда.

Бастакы түһүмэххэ турок сэрэтиинэн биир очукуону ылла. Иккис түһүмэх саҕаланыытыгар ахсааны 2:0 оҥордо. Владислав тиһэх сөкүүндэлэргэ кимиилээхтик тустан, бастаан түөрт, онтон икки очукуону ылан, хапсыһыыны бэйэтин туһатыгар түмүктээтэ. Салгыы Армен Аракелян (Украина) — Иван Замфиров (Молдова) көрсүһүүлэрин кыайыылааҕын кытта тустуоҕа.

Манна бэлиэтээн эттэххэ, Владислав бүгүн 31сааһын туолла.

Роман Попов, «Саха сирэ» хаһыат.

Хаартыска Интэриниэттэн ылылынна.