Беларуссия былааҕынан тустар биир дойдулаахпыт Владислав Андреев Каспийскайга буола турар Европа чөмпүйэнээтигэр финал аҥарыгар таҕыста.
edersaas.ru
57 киилэҕэ диэри ыйааһыҥҥа тустар Владислав бастакы хапсыһыытыгар Турция бөҕөһүн Ахмет Пекеры 6:2 ахсаанынан сабырыйда. Салгыы Украинаттан сылдьар Армен Аркеляны эмиэ тиһэх сөкүүндэлэргэ бастаан түөрт очукуоҕа быраҕан түһэрдэ, онтон накаттаан өссө икки очукуону ылан, түмүккэ 7:2 ахсаанынан хотон таҕыста.
Финал аҥарыгар кинини утары Европа чөмпүйүөнэ Георгий Эдишерашвили (Азербайджан) тахсыаҕа. Атын сеткаттан финал аҥарыгар Леван Метревили (Испания) уонна Завур Угуев (Арассыыйа) тустуохтара.
Бу иннинэ Эдишерашвили Мигран Джабуряны (Армения) 10:0, Метревели Юрий Голубу (Израиль) 10:4, Угуев Зохейр Эль Уаррагы (Франция) 6:0 ахсаанынан кыайталаабыттара.
Финал аҥарынааҕы хапсыһыылар Дьокуускай бириэмэтинэн 23 чаастан саҕаланыахтара.
Роман Попов, «Саха сирэ» хаһыат
Хаартыска Интэриниэттэн ылылынна.