Ааспыт өрөбүлгэ Каспийскай куоракка түмүктэммит Европа чөмпүйэнээтигэр саха тустууга оскуолатын иитиллээччи Владислав Андреев Белоруссия былааҕынан кыттан үһүс бириистээх миэстэҕэ тахсары ситистэ.
Икки сыл кэриҥэ тохтобул кэнниттэн улахан көбүөргэ төннүбүт Ньурба бөҕөһө көҥүл тустууга 57 киилэҕэ диэри ыйааһыҥҥа Турцияттан сылдьар Европа призерун Ахмет Пекеры (6:2), Украина тустуугун Армен Аркеляны (7:2) кыайталаан баран, финал аҥарыгар Европа чөмпүйүөнүгэр Георгий Эдишерашвилига 4:1 ахсаанынан сабырыйтарда. Салгыы үһүс миэстэ иһин хапсыһыыга Мигран Джабуряны (Армения) 8:1 ахсаанынан баһыйа тутта.
Итинэн Владислав Европа түһүлгэтин түөрт төгүллээх призерунан буолары ситистэ. Бу иннинэ кини биир үрүҥ көмүс, икки боруонса мэтээллэри ылан турар.
Оттон 61 киилэлээхтэргэ эмиэ Белоруссия аатыттан тустубут Ньургун Скрябиммыт Реджеп Топалы кытта эмиэ үһүс миэстэ иһин быһаарыылаах хапсыһыылара 6:6 ахсаанынан түмүктэннэ. Манна кыайыыны хаачыстыбанан Турция бөҕөһүгэр биэрдилэр. Кини бастакы түһүмэххэ оҥорбут быраҕыытын судьуйалар түөрт очукуонан сыаналаатылар. Бу иннинэ Мэҥэ бөҕөһө Македония тустууга Эймедин Сейфуловы хотон баран (13:2), иккис эргииргэ Европа чөмпүйүөнүгэр, аан дойду призеругар Гаджимурад Рашидовка (Арассыыйа) 1:10 ахсаанынан сабырыйтарда. Салгыы эрэхтээх хапсыһыыга Украинаттан сылдьар утарылаһааччытын Владимир Буруковы ыраастык кыайан үһүс миэстэ иһин кирсэр быраабы ылбыта.
Роман Попов, “Саха сирэ” хаһыат