Владимир Хинчегашвили уонна Таха Акгюль Коркин турнирыгар кэлиэхтэрэ (ВИДЕО)

Балаҕан ыйын 26 күнүгэр «Триумф» спорт киинигэр, көҥүл тустууга  Саха Өрөспүүбүлүкэтин хомуур хамаандата Дмитрий Коркин аатынан норуоттар икки ардыларынааҕы турнирга бэлэмнэнэр аһаҕас дьарыга буолла. 

Леонид Спиридонов, Спортивнай маастарыстыба үрдүкү оскуолатын (ШВСМ) дириэктэрин солбуйааччы:

— Саха Өрөспүүбүлүкэтин хамаандатын бэлэмэ билиҥҥи туругунан үчүгэй. Бу күннэргэ сбор буола турар. Ааспыт нэдиэлэҕэ Чурапчы улууһугар Монголия уонна Саха сирин хамаандата табаарыстыы көрсүһүүгэ кииристилэр. 6:2 ахсаанынан Саха сирин хамаандата кыайда. Ити көрсүһүү бэлэмнэнии бырагыраамматыгар киирэр. Дьарык улахан нагрузката бүттэ. Бу нэдиэлэҕэ уолаттар ыйааһыннарын оҥостоллор уонна киирсиигэ турукка киирэллэр. Дмитрий Коркин аатынан норуоттар икки ардыларынааҕы турнирбытыгар 24 тас дойдулар хамаандалара кэлэллэрэ күүтүллэр. Иран , Турция, Белоруссия, Узбекистан уонна Монголия хамаандалара күүстээх хамаандалаахтарын бэлиэтиир тустаахпыт. Билиҥҥи туругунан 12 хамаанда кэллэ. Маны таһынан, олимпийскай чөмпүйүөннэр Владимир Хинчегашвили уонна Таха Акгюль бочуоттаах ыалдьыт быһыытынан кэлиэхтэрэ.

ВИДЕО:

Николай Попов, «Саха сирэ» хаһыат, edersaas.ru