Саха Өрөспүүбүлүкэтин көҕүлээһининэн Норуоттар икки ардыларынааҕы II Хотугу пуорум түөрт күн устата үлэлээтэ.
Пуорум дириэктэрин солбуйааччы эбээһинэһин толорооччу Владимир Васильев быһа эпииргэ тэрээһин туох түмүктээх буолбутун кэпсээтэ, киирэр ыйытыыларга хоруйдаата.
edersaas.ru
«Коронавирус дьаҥа туран, пандемия олохпут укулаатыгар уларытыылары киллэрэн, тэрээһин онлайн киэбинэн аан бастакытын барда. Баҕар, ол да иһин буолуо, былырыыҥҥытааҕар быдан элбэх дойду кытынна. 20 судаарыстыбаттан 300 эспиэр үлэлээтэ, итиэннэ көннөрү истээччи ахсаана тыһыынчаны ааста. Холобур, былырыын пуорум иитинэн 43 тэрээһин ыытыллыбыт буоллаҕына, быйыл 60 тэрээһин буолла,» — диэн Владимир Васильев эттэ.
Быйылгы пуорум сүрүннээн Хоту сиргэ уонна Арктикаҕа суол-иис, тырааныспар кыһалҕаларын тула барда. Маны сэргэ Арктикаҕа сыһыаннаах сокуону оҥорууга уонна киһи хапытаалыгар болҕомто уурдулар. “Биһиэхэ бу пуорум ыытыллара олус туһалаах — араас дойду көрүүтүн, санаатын истии хайаан да наада. Сытыы кыһалҕалары хайдах быһаараллара, уопуттара Саха сирин инфраструктуратын тупсарыыгар оруола улахан,” — диэн Владимир Николаевич Арктиканы Азияны кытта ситими олохтуур ураты тэрээһин буолла диэн бэлиэтиир.
Пуорумҥа ыччат былаһаакката туспа ыытылынна: «Бу олус үчүгэй дии саныыбын. Ыччаттар Арктика сайдыытыгар, кыһалҕаларыгар бэйэлэрин көрүүлэрин этиннилэр, уопут атастастылар. Ордук киһи хапытаалыгар, талааннаах ыччаты түмүүгэ, үөрэх, билии өттүгэр сэргэх кэпсэтии таҕыста. Экология, ириэрии боппуруостарыгар бэрт сытыы мөккүөр күөдьүйдэ.
Маны таһынан, араас куонкурустар уо.д.а. тэрээһиннэр пуорум иһинэн олус сэргэхтик бардылар. Холобур, экологияҕа сыһыаннаах куонкурус аан дойду ыччатын түмэ тарта. Туризм эйгэтин сайыннарыы, экэниэмикэҕэ барыстаах бырайыактары тобулуу туһунан кэпсэтиилэр үрдүк таһымҥа аастылар,» — диэн Владимир Васильев түмүктээтэ.
Резолюция түмүгэ өссө да тахса илик. «Кыттааччылартан этиилэри билигин да тута олоробут,” — диэн Владимир Васильев эбэн эттэ.
Ирина Ханды, “Саха сирэ” хаһыат, edersaas.ru
Хаартыска — Владимир Васильев «Инстаграмыттан».