Бүгүн Уус Алдан Курбуһаҕар VIII Спортивнай оонньуулар уоттарын арыаллаан илдьэ кэлбит эстафета кыттыылаахтарын биир дойдулаахтара чиэстээн көрүстүлэр.
Бу туһунан нэһилиэк оскуолатын бибилэтиэкэрэ Ариадна Копырина иһитиннэрэр:
— Өрөспүүбүлүкэҕҥэ биллэр сүүрүүк спортсменнарбытын Уус Күөлэ нэһилиэгин олохтоохторо, ыччаттара киин уулусса икки өттүнэн сэлэлии туран, уруйдаан-айхаллаан көрүстүбүт.
Эстафетаҕа биһиги биир дойдулаахпыт, физкультура учуутала Владимир Тордуянов кыттыыны ылла. Владимир Иванович «Азия оҕолоро» Норуоттар икки ардыларынааҕы спортивнай оонньуулар хас да төгүллээх, «Манчаары» оонньууларын уоттарын арыаллыыр эстафета солбуллубат кыттыылааҕа.
Киниэхэ бүгүн СӨ физическэй култууратын туйгуна үрдүк ааты үөрүүлээх быһыыга-майгыга туттардылар.
Убаастыыр учууталбытын бу дьоһуннаах наҕараадатынан эҕэрдэлиибит! Аны да үүнэр көлүөнэни спортка, сүүрүүгэ утумнаахтык уһуйан, эрчийэн, кыайыылаах, ситиһиилээх оҕолору өссө да таһаара турарыгар баҕарабыт.
Елена ПОТОЦКАЯ, «Саха сирэ» хаһыат.