Владимир ТИХОНОВ: “Култуурунай бырагыраамабыт Москва өйөбүлүнэн ыытылынна”
СӨ Култууратын уонна духуобунай сайдыытын миниистирэ Москва култууратын уонна искусствотын деятеллэрин кытта көрсүһүүтүгэр, Саха сирэ Арассыыйа судаарыстыбатын састаабыгар киирбитэ 385 сылыгар аналлаах Саха сирин Күннэрин култуурунай бырагыраамаларын тэрийсээччилэргэ махталын биллэрдэ. Кини, федеральнай киин айар үлэ, үп уонна тэрээһин өттүнэн көмөлөспүт буолан, биһиги бэйэбит өрөспүүбүлүкэбит култууратын бары өттүттэн үчүгэйдик көрдөрдүбүт, диэн бэлиэтээтэ.
Кэнники сылларга РФ Култууратын министиэристибэтэ эрэгийиэннэри кытта үлэтин биллэ күүһүртэ: миэстэтигэр хастыы даҕаны хайысханан култуура тэрилтэлэрин үлэтин кыттыгас үбүлээһиҥҥэ киэҥ хабааннаах бырайыактар саҕаланнылар.
Ол курдук, быйыл өрөспүүбүлүкэ Ньурбатааҕы көһө сылдьар тыйаатыр, Актер уонна куукула тыйаатырын, Үүнэр көлүөнэ тыйаатырын, түөрт саҥа киинэ тыйаатырын, 19 тыа сирин кулуубун светомуусуканан, кириэһилэлэринэн уонна сцена таҥаһынан хааччыйыыга анаан федеральнай үбүлүлээһининэн хаһааҥҥытааҕар даҕаны элбэх – 80 мөлүйүөн солкуобай харчыны ылла.
Маны таһынан, тыйаатырдар гастролларын итиэннэ билитиэкэлэри эмиэ кыттыһан үбүлээһин буолла (2017 сылга икки тыйаатыр атын эрэгийиэннэргэ ситиһиилээхтик гастроллаата), тыа сирин култууратын бастыҥ тэрилтэлэригэр уонна үлэһиттэригэр федеральнай граннар ананнылар.
РФ Култууратын министиэристибэтэ Нуучча судаарыстыбаннай академическай тыйаатырыгар, “Святитель Иннокентий” испэктээги туруорарыгар анаан, 6 мөл. солкуобайдаах граны туттарда, итини таһынан, Саха сирин музыкальнай искусствотын маастардарын кэнсиэригэр анаан Россиятааҕы академическай ыччат тыйаатырын кэпсэттэ. Бу ситиһиилэри уонна салгыы сайдыы боппуруостарын миниистир Владимир Тихонов статс-сэкирэтээр, РФ култууратын миниистирин солбуйааччы Александр Журавскайы кытта анаан көрсүһүүтүгэр дьүүллэстилэр.
Москва Култууратын департамена эмиэ улаханнык өйөөтө – култуураҕа хардарыта бииргэ үлэлэһии чэрчитинэн, Саха сириттэн артыыстар дэлэгээссийэлэрин олорор сиринэн, аһылыгынан уонна тырааныспарынан хааччыйыыны бэйэтигэр ылынна.
Көрсүһүү кэмигэр биир идэлээхтэр салгыы бэйэ-бэйэҕэ көмөлөсүһэргэ мэктиэлэстилэр итиэннэ холбоһуктаах бырайыактары олоххо киллэрии үлэлэрин былааннастылар.
Үөрүүлээх быһыыга-майгыга миниистир Владимир Тихонов Арассыыйа култууратын, искусствотын деятеллэригэр “Саха сирэ Арассыыйаны кытта 385 сыл” бочуоттаах бэлиэлэри туттарда. Наҕараадаламмыттар ортолоругар Гастроллары өйүүр федеральнай киин дириэктэрэ, «Большие гастроли» бырагыраама салайааччыта Елена Булукова, бырайыак координатора, Норуоттар икки ардыларынааҕы култуурунай киин дириэктэрин солбуйааччы Илья Рейзис, искусствоведение доктора, «Кинээс Игорь» опера эрэдээксийэтин ааптара Евгений Левашев, В.С.Щепкин аатынан Үрдүкү театральнай училище преподавателэ Лариса Максимова, Алтай бэйиэтэ, биллиилээх востоковед-тюрколог Бронтой Бедюров, биир дойдулаахпыт, суруйааччы, «Общеписательская литературная газета» эрэдээктэрэ Владимир Федоров, уо.д.а. бааллар.
СӨ Култууратын уонна духуобунай сайдыытын министиэристибэтин пресс-киинэ, «Саха сирэ» хаһыат, edersaas.ru