Владимир Тихоновы миниистири солбуйааччынан анаатылар

Ааптар: 
Бөлөххө киир:

СӨ култууратын уонна духуобунай сайдыытын миниистиринэн олорбут Владимир Тихонов бүгүн соһуччу үөрэх уонна наукатын миниистирин солбуйааччынан ананна.

edersaas.ru

Туһааннаах ыйаахха Ил Дархан Айсен Николаев илиитин бүгүн баттаата.

Санатан эттэххэ, Владимир Иванович култуура уонна духуобунай сайдыы миниистиринэн 2014 сыл алтынньытыгар анаммыта. Миниистиринэн 4 сыл үлэлээтэ. Бэйэтэ идэтинэн педагог. Онон үөрэх эйгэтигэр «халлаантан түспүт» киһи буолбатах диэххэ сөп. Ол курдук, 1989 сыллаахха Хабаровскайдааҕы судаарыстыбаннай педагогическай институту, 2008 с. РФ бэрэсидьиэнин судаарыстыбаннай сулууспаҕа Арассыыйатааҕы академиятын бүтэрбитэ. Сунтаар улууһун баһылыгынан үлэлээбитэ.

Ыспыраапка

Тихонов Владимир Иванович

1964 с. муус устар 8 күнүгэр Сунтаар улууһун Уһун Күөл сэлиэнньэтигэр төрөөбүтэ.

1989-1992 гг. – Мэҥэ Хаҥалас улууһун Хорообут орто оскуолатыгар байыаннай салайааччы.

1992-1994 сс. – Хорообут оскуолатын дириэктэрин иитэр үлэҕэ солбуйааччы.

1994-1996 сс. –  Мэҥэ Хаҥалас улууһун Томтор оскуолатын дириэктэрэ.

1996-1998 сс. – Мэҥэ Хаҥалас улууһун Майатааҕы I сүһүөх оскуолатын дириэктэрэ.

1998-2003 сс. – Мэҥэ Хаҥалас улууһун Майа гимназиятыгар дириэктэр.

2003 с. – Сунтаар улууһун үөрэҕин управлениетын начаалынньыгын эбээһинэһин толорооччу.

2003-2007 сс. – Сунтаар улууһун үөрэҕин управлениетын начаалынньыга.

2007-2014 сс. – Сунтаар улууһун баһылыга.

2014 с. алтынньы 6 күнүттэн СӨ култууратын уонна духуобунай сайдыыга миниистиринэн үлэлээбитэ.


Людмила ПОПОВА, “Саха сирэ” хаһыат, edersaas.ru

P.S. Эми бу күн Ил Дархан Айсен Николаев Георгий Евгеньевич Герасимовы СӨ Бырамыысыланнаһын уонна геологиятын миниистирин солбуйааччытын дуоһунаһыттан, «биэнсийэҕэ тахсарынан» диэн быһаарыылаах, босхолоото.

+1
0
+1
0
+1
0
+1
0
+1
0
+1
0
+1
0