Бырабыыталыстыба бэрэссэдээтэлин э.т. Владимир Солодов өрөспүүбүлүкэ учуонайдарын кытары көрүстэ.
edersaas.ru.
М.В.Ломоносов аатынан МГУ-га судаарыстыбаннай салалта факультетыгар преподавателинэн үлэлээбит буолан, Владимир Солодов киниэхэ наука эйгэтэ улахан суолталааҕын бэлиэтээтэ. Ил Дархан э.т. Айсен Николаев наука ситиһиилэригэр тирэҕирэн. экономиканы сайыннарыыны түргэтэтэр соругу туруорбутун эттэ.
— Онон, өрөспүүбүлүкэ салалтатын уонна учуонайдарын бииргэ үлэлээһиннэригэр наука уонна экономика ситимнэһиилэрэ ураты тутуллар хайысха буолуоҕа, — диэтэ миниистирдэр кэбиниэттэрин баһылыгын э.т. В.Солодов.
СӨ Наукаларын академиятын бэрэсидьиэнэ, геолого-минералогическай наука дуоктара, профессор Игорь Колодезников Наукалар академиялара ыытар научнай-чинчийэр уонна тэрийэр үлэтин-хамнаһын туһунан кэпсээтэ. 2016-2020 сс. оҥоруулаах күүстэри уонна социальнай эйгэни сайыннарыыга туһуламмыт научнай чинчийиилэр кэлим бырагыраамаларын чэрчитинэн ыытыллар үлэ бастакы түһүмэҕин түмүгүн билиһиннэрдэ. Өрөспүүбүлүкэ социальнай-экономическай туругар итиэннэ сайдыытыгар сабыдыаллыыр араас төрүөттэри кэлим ырытан сыаналааһын аан бастаан ыытыллыбыт. Ол курдук, үбү угууну, бырамыысыланнаһы, энергетиканы, тырааныспары, агропромышленнай комплексы киллэрэн туран, кэлим ырытан сыаналааһын «Айылҕа», «Киһи», «Экономика” диэн үс хайысханан оҥоһуллубут. Болҕомто ордук сир баайын хостуур тэрилтэлэр үлэлиир түбэлэригэр уонна ыксаллаах быһыы-майгы тахсыан сөптөөх сирдэригэр экология туругун чинчийиигэ ууруллубут. Аҕыйах ахсааннаах төрүт олохтоох хотугу омуктар түөлбэлээн олорор оройуоннарыгар экосистема, тулалыыр айылҕа, кыыл-сүөл, көтөр-сүүрэр туруга үөрэтиллибит. Академик этэринэн, чинчийии иккис түһүмэҕэ өрөспүүбүлүкэ научнай-тэхиньиичэскэй сайдыытын уһун сылларга барыллааһыҥҥа ананыахтаах итиэннэ экономика араас салааларын сайыннарыы стратегиятыгар тирэх буолуохтаах.
Көрсүһүүнү түмүктүүрүгэр премьер фундаментальнай науканы чорботор уонна чинчийэр үлэҕэ ыччаты тардар наадатын эттэ.
— Аан дойду таһымыгар тахсар кыахтаах наука эйгэлэрин сайыннарыахха, онон, аан дойдуга наука ситиһиитин мэлдьи кэтээн көрүөххэ, үөрэтиэххэ наада. Өрөспүүбүлүкэ социальнай-экономическэй сайдыытыгар бэйэбит научнай кыахпытын көдьүүстээхтик туһаныаҕыҥ, — диэтэ.
Раиса Сибирякова, “Саха сирэ” edersaas.ru.