Владимир Солодов: Саха сирин норуоттарын оонньууларын көмөтүнэн спорка интэриэс уһуктар

Амма улууһугар Саха сирин норуоттарын  VII оонньуулара түмүктэннилэр. Бу туһунан бырабыыталыстыба бэрэссэдээтэлэ Владимир Солодов эттэ. 

Саха сирин норуоттарын оонньуулара түөрт сылга биирдэ ыытыллаллар уонна өрөспүүбүлүкэтээҕи Олимпиада курдук буолаллар. “Оонньуулар тэриллибит оройуоннарыгар спорка интэриэс уһуктарын көрөбүт. Маныаха Амма улууһа холобур буолар, бүгүн хамаанданан уопсай зачекка иккис миэстэни ылан, мэтээл бөҕөтүн хомуйда”, — диэн бэлиэтээтэ премьер.

Киэҥ хабааннаах оонньууларга Амма өрөспүүбүлүкэ араас муннуктарыттан 15 тыһыынча ыалдьыты түмтэ. Владимир Солодов, ыалдьыттары уонна спортсменнары сэргэ үүнэр көлүөнэ мантан спорт чыпчаалларыгар дабайыа диэн эбэн эттэ.

“Дойду бэрэсидьиэнэ Арассыыйа хас иккис олохтооҕо, ол эбэтэр 55 бырыһыана спордунан мэлдьи дьарыктаныахтаах диэн соругу туруорбута. Маннык тэрээһиннэр дьону спорка көҕүлүүллэр уонна спорка кыайыы-хотуу олоххо ситиһиини аҕалар”, — диэн өрөспүүбүлүкэ бырабыыталыстыбатын бэрэссэдээтэлэ бэлиэтээтэ.

Премьер спорт адаптивнай көрүҥнэригэр кыттар спортсменнары бэлиэтээтэ, маннык күрэхтэһиилэр Саха сирин спортивнай оонньууларын историятыгар аан бастаан ыытылыннылар. «Физическэй өттүнэн ураты дьон спордунан дьарыктаналларыгар көмөлөһүөхтээхпит. Бу күрэхтэһиигэ кыттыбыт, тулуурдарын, маастарыстыбаларын көрдөрбүт, туруоруллубут сыалларын ситиһэргэ дьулуспут 240  кыттааччыга махтанабын”, — диэтэ Солодов.

Иван Евсеев.