Владимир Солодов Булуҥ оройуонун сүрүн балык хаһаайыстыбаларыгар сырытта
Владимир Солодов Булуҥ оройуонугар балык хаһаайыстыбаларыгар – “Тиит Арыы” ХЭТ-кэ, “Туймаада Агроснаб” АУо-ҕа уонна “Булуҥ” МУП-ка сырытта.
“Тиит Арыы” механизация көмөтүнэн балыктыыр хаһаайыстыбаны Николай Маркевич салайар. “Сезоҥҥа манна уон балыксыттаахпын, өссө биир итиччэ киһи бултааһын тэхиньиичэскэй өттүн көрөр-истэр. Материальнай-тэхиньиичэскэй хааччыллыыга улахан болҕомтобутун уурабыт. Билигин арыыга тута тоҥорор сыах, 250 туонналаах булуус, рефконтейнердар бааллар, сыллата илиммитин, дьоҕус суудуналарбытын уонна мотуордаах оҥочобутун саҥардабыт”, — диэн бэлиэтээтэ предприниматель Николай Маркевич.
Өрөспүүбүлүкэ үрдүнэн уонна тас өттүгэр сибиэһэй балыгынан эргинэр “Туймаада Агроснаб” АУо үлэ усулуобуйатын эмиэ тупсарарга дьулуһар. Тэрилтэ үлэһиттэрэ кэпсээбиттэринэн, балыгы тута тоҥороот, туспа таараҕа – былаастык бакыакка суулууллар. Ити түмүгэр балык ирбэккэ, тиэрдиллиэхтээх сиригэр көрүҥүн сүтэрбэккэ тиийэр кыахтанар. Хампаанньа инникитин уҥуоҕа суох балыгынан хааччыйыыны баһылыыр баҕалаах.
“Булуҥнааҕы” МУП кыһыл көмүс хатырыктаах араас көрүҥүн күөх далайтан сомсор, 2019 сылга квоталара 280 туоннаҕа тэҥнэһэр. Быйыл Кумах Сурт учаастагар улахан булуустарын саҥартылар.
Саха сирин Бырабыыталыстыбатын Бэрэссэдээтэлэ Владимир Солодов тэрилтэ үлэтин үрдүктүк сыаналаата уонна өрөспүүбүлүкэ бырабыыталыстыбата биисинэҺи уонна гостэрилтэлэри өйөөһүҥҥэ улахан үлэни ыытарын эттэ. “Быйыл “Туймаада Агроснаб” уонна “Якутоптторг” тэрилтэлэри холбообуппут. Холбоһуктаах тэрилтэ бэлэмнэниллибит балыгы тиэйиэҕэ уонна балыксыттарга дьиҥнээх көмөлөһөөччүнэн буолуоҕа”, — диэн Владимир Солодов бэлиэтээтэ. Премьер-миниистир Саха сирин балыктарын – муора уомулун, тууччаҕы, чыыры Саха сирин тас өттүгэр таһаарар үлэни күүһүрдэргэ эттэ. Кини маннык сорудаҕы предпринимательство уонна туризм дьыалатын министиэристибэтигэр биэрдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата