Бырабыыталыстыба Бэрэссэдээтэлэ Владимир Солодов Булуҥ улууһугар балык соҕотуопкатыгар үлэлиир хаһаайыстыбалар: “Туймаада Агроснаб” АУо, “Тиит Арыы” ХЭУо уонна “Булуҥ” МУТ үлэлэрин-хамнастарын билистэ.
edersaas.ru.
“Туймаада Агроснаб” хампаанньа балык соҕотуопкатынан дьарыктанар биир бөдөҥ тэрилтэ буолар. Хаһаайыстыбалартан дуогабар быһыытынан туппут балыгын тута тоҥорон, пластик бакыаттарга суулуур. Онон, аналлаах сиригэр, Дьокуускайга, диэри бородууксуйа төрүт ирбэккэ, хаачыстыбатын сүтэрбэккэ аҕалыллар. Хампаанньа балыгы бэйэтэ астаан (тууһаан, хатаран уо.д.а.) батарар, быйылгыттан балык филетын оҥорорго ылсар былааннаах.
Сүүрбэ үлэһиттээх «Тиит Арыы» ХЭУо эмиэ тиэхиньикэ күүһүн көдьүүстээхтик туһанар.
– Балыкка уон киһи сылдьар, биир оччо киһи бултаммыт балыгы таҥастааһыҥҥа үлэлиир, Бородууксуйабыт хаачыстыбалаах буоларын туһугар материальнай-техническэй өттүнэн хааччыллыыга болҕомтобутун уурабыт. Ол түмүгэр, бултаммыт балыгы тута тоҥорон харайабыт, 250 туонна балыгы угар булуустаахпыт уонна рефконтейнердардаахпыт. Сыллата төһө кыалларынан илимнэрбиин, оҥочолорбутун саҥардан иһэбит, – диэн кэпсиир ХЭУо салайааччыта Николай Маркевич.
«Булуҥ» МУТ сайын устата 280 туонна балыгы бултуур кубуоталаах. Хаһаайыстыба быйыл Кумах Сурт учаастагар баар булууһун саҥардан оҥорбут.
Владимир Солодов көмүс хатырыктааҕы соҕотуопкалыыр хаһаайыстыбалар үлэлэрин-хамнастарын үрдүктүк сыаналаата, көрүллэр көмөнү көдьүүстээхтик туһаналларын хайҕаата.
— Быйыл икки тэрилтэ, “Туймаада Агроснаб” уонна “Якутоптторг”, холбоһон күүстэрин түмэн, биир хампаанньа быһыытынан үлэлиэхтэрэ. Кинилэр иннилэригэр балык бородууксуйаны оҥоруу уонна батарыы кээмэйин балачча үрдэтэр, ону таһынан чыыры, уомулу өрөспүүбүлүкэ таһыгар таһаарар сорук турар, – диэтэ Владимир Солодов итиэннэ оробуочай сырыы түмүгүнэн Урбааны уонна туризмы сайыннарыы министиэристибэтигэр кэккэ сорудахтары биэрдэ.
Бу туһунан Ил Дархан уонна Бырабыыталыстыба дьаһалтатын пресс-киинэ иһитиннэрдэ.
Раиса Сибирякова, «Саха сирэ» edersaas.ru.