Уопсастыба

Владимир Солодов: «Быраҕыллыбыт тутуу кэмигэр бүтэрин ситиһиэхпит!”

СӨ Бырабыыталыстыбатын бэрэссэдээтэлин э.т. Владимир Солодов балаҕан ыйын 6 күнүгэр ыыппыт мунньаҕар Саха сирин кыһалҕаҕа ыктарбыт тутууларын хайдах гынан бүтэриэххэ сөбүн тула киэҥ далааһыннаах кэпсэтии таҕыста. Өлүүлэһэн тутууга албыннаппыт дьон испииһэгэр бүгүҥҥүтэ өрөспүүбүлүкэ үрдүнэн 144 киһи баар.

edersaas.ru

Тутуллан иһэн тохтоон хаалбыт эбийиэктэр үгүстэрэ Дьокуускайга, сороҕо Чурапчыга бааллар. Премьер этэринэн, бу сыл бүтүөр диэри өр тутуллар дьиэлэр ахсааннара алта эбийиэккэ диэри аччыахтаах.

Кыһалҕалаах тутуу ахсааныгар киирэр кутталлаах дьиэлэр туруктарын, үлэ хаамыытын, тэрилтэ үбүн-харчытын СӨ Тутууга министиэристибэтэ хонтуруоллуур. Госдуума дьокутаата, «Биир Ньыгыл Арассыыйа» баартыйа өлүүлэһэн тутууга киирэн баран албыннаппыт, харчыларын уурдарыыга угаайыга түбэспит дьон интэриэһин көмүскүүр бөлөх салайааччыта Александр Сидякин: «Судаарыстыба дьону албыннаабатах, ити суобаһа суох урбаанньыттар угаайыларыгар киирэн биэрбит дьону көмүскүүргэ, өлүүлэһэн тутуу кыттааччыларын өйүүргэ өрөспүүбүлүкэҕэ күүстээх суут-сокуон үлэлиир. Кинилэр сыраларынан кэнники кэмҥэ 1,3 тыһ. киһи дьиэлэннэ», — диэн бэлиэтээтэ.

Кыһалҕалаах эбийиэктэртэн биирдэстэригэр, «Хотугу тутуу хампаанньата» ХЭТ дьыалатын быһаарарга, мунньубут иэһин сабарга 25 мөл. наадата этилиннэ.

Ильинкаҕа дьиэ тутар тэрилтэ дириэктэрэ Иван Черов былырыын ахсынньыга олохтон туораан, «Черов и К» хампаанньа нэһилиэстибэтин ылааччы биллэ илик. Баҕар атын тутааччы онно баар дьиэлэр тутууларын түмүктүө.

Чурапчыга «Макрос» дьиэлэрин өлүүлэһэн тутууга киирбит дьон «Надежда» дьиэ-уот кэпэрэтиибин тэринэн, бэйэлэрэ ситэри тута сылдьаллар. Тутууну бүтэрэллэригэр кинилэргэ бүддьүөттэн 10 мөл. солк. тахса суумалаах үбүлээһин көрүллүбүтэ.

Оттон «Стерх» кэпэрэтиип уонна «Теплосервис» ХЭТ биир кыбартыыраны иккитэ атыылаабыттар. «Иккитэ атыылааһынтан эмсэҕэлээбит дьон испииһэгин оҥорон, кинилэр төһө суумалаах харчыны укпуттарын чуолкайдаан баран туох-хайдах көмө оҥорорбутун быһаарыахпыт. Бүддьүөт кыаҕар тирэҕирэн, социальнай төлөбүр бэриллиэҕэ, эбэтэр тутууну салгыахпыт», — диэн мунньах түмүгэр Владимир Солодов эттэ.

Өлүүлэһэн тутууга дьону албыннаабыт тутуу хампаанньаларыгар: «Хотугу тутуу хампаанньата» ХЭТ,  «Черов и К», «Симиир» холуобунай дьыала тэриллибит.

 

Марианна Тыртыкова, «Саха сирэ», edersaas.ru

0
0
Telegram @edersaas20

Добавить комментарий