Владимир Сивцев: Нерюнгри аэропуорда бары көрүҥнээх салгын суудуналарын олордуоҕа
Саҥардан оҥоруу кэнниттэн Нерюнгри аэропуорда төһө тупсубутуй? Ханнык сөмөлүөттэр олоруохтарын сөбүн ааҕыҥ.
Сэтинньи 1 күнүттэн Нерюнгри аэропуорда дьыл кэминээҕи араспысаанньанан хааччаҕа суох салгын бары көрүҥнээх суудуналарын олордуоҕа. Бу туһунан СИА-ҕа тырааныспар уонна суол хаһаайыстыбатын миниистирэ Владимир Сивцев иһитиннэрдэ.
“Тустаах бырайыак Арассыыйа бэрэсидьиэнэ Владимир Путин сорудаҕынан торумнаммыт магистральнай инфраструктураны саҥардан оҥоруу кэлимсэ былаанынан олоххо киирэр. Саха сирин баһылыга Айсен Николаев бу бырагыраамаҕа өрөспүүбүлүкэ 16 аэропуорда киирэрин ситиспитэ”, — диэтэ Владимир Сивцев.
Миниистир балаһаны саҥардыыга аэропуорт рейстэри ыытар уонна тоһуйар кыаҕа суох кэмигэр Айсен Николаев тус сорудаҕынан Нерюнгри оройуонун олохтоохторун тырааныспарынан эбии хааччыйыы тиһигэ оҥоһуллан – Владивостокка, Хабаровскайга уонна Благовещенскайга диэри тимир суол маршруттара кэҥээбитин санатта.
“Тутааччылар күүстэринэн биһиги олох кылгас кэмҥэ толордубут. Бүгүн салгын бары көрүҥнээх суудуналарын түһэрэр-көтүтэр кыахтаах искусственнай балаһа үлэтэ түмүктэннэ. Бу балаһа Ростехнадзор сөбүлэҥин ылла. Бүгүн сэртипикээссийэни ааһан, алтынньы 28 күнүгэр көҥүлү ылыаҕа”, — диэтэ Владимир Сивцев.
Бастакы рейстэри “Якутия” авиахампаанньа Нерюнгри-Новосибирскай, Нерюнгри-Дьокуускай туһаайыыларынан былааннаата. Нөҥүө күнүгэр Москва-Нерюнгри рейсэ көтүөҕэ.
“Балаһаны тутуу түмүктэммитин кэнниттэн Нерюнгри аэропуордугар үлэ кэлэр сыл бүтүөр диэри салҕаныаҕа. Ити түмүктэннэҕинэ Нерюнгри олохтоохторо аныгы терминалланыахтара ”, — диэн миниистир бэлиэтээтэ.
Сахаговтан
Бэлэмнээтэ Женни Стрюкова
Хаартыска: тустаах саайтан