Владимир Путин: «Успуордунан дьарыктаныы босхо буолуохтаах»
Алтынньы 6 күнүгэр Владимир Путин дойдуга физическэй култуура уонна успуорт сайдыытын Сэбиэтин мунньаҕын ыытта.
edersaas.ru
Дьон-сэргэ усупордунан дьарыктанара элбээн иһэрэ үөрдэр. Бэрэсидьиэн мунньаҕы статистикаттан саҕалаата. Ол курдук, уон сыл анараа өттүнээҕи көрдөрүүнү кытта тэҥнээтэххэ, успуордунан дьарыктанар дьон ахсаана 2,5 төгүл элбээбит. Ол аата, нэһилиэнньэ 40% успуордунан ситимнээхтик дьарыктанар буолбут.
Владимир Путин: «2030 сылга диэри, аны, 70% хабар сорук турар. Манна нэһилиэнньэ олорор сириттэн ырааҕа суох успуорт саалалара, тэрилтэлэрэ баар буолуохтаахтар. Итиэннэ үксэ босхо буолуохтаах», — диэн тоһоҕолоон эттэ. Маны сэргэ, ГТО хамсааһынын сайыннарар, кэнсиэпсийэтин уларытар, итиэннэ күрэхтэһии көрүҥнэриттэн киллэрэр сорук туруорулунна.
Маны сэргэ, педагогическай ыстаас, уоппуска, тириэньэрдэргэ ааты иҥэрии, биэнсийэ боппуруостара таарылыннылар. Тириэньэр үлэтин учууталы кытта тэҥнииргэ, чааһын элбэтэргэ диэн этии киирдэ.
«Биһиги иннибитигэр балысхан соруктар тураллар – успуорт төһө да кэккэ ыарахаттары көрүстэр, Аан дойдуга инники күөҥҥэ тахсыах тустаахпыт. Онно ыччаты бэлэмнээһиҥҥэ, аныгы олоххо сөп түбэһэр ирдэбилинэн үлэлиирбит наада”, — диэн Арассыыйа успуордун миниистирэ Олег Матыцин эттэ.
2030 сылга диэри успуорт сайдыытын стратегията бары көннөрүүлэри, этиилэри учуоттаан туран, сыл бүтүөр диэри бэлэм буолуохтаах.
Ирина Ханды, “Саха сирэ” хаһыат, edersaas.ru