Владимир Путин уонна Си Цзиньпин “Сибиир күүһүн” үлэлэтиигэ кыттыахтара

“Сибиир күүһэ” гаас утаҕын үлэлэтиигэ анаммыт РФ уонна Кытай Норуодунай Өрөспүүбүлүкэтин баһылыктара Владимир Путин, Си Цзиньпин кыттыахтаах теле-сибээстэһиилэрэ ахсынньы 2 күнүгэр буолара күүтүллэр итиэннэ аччыгыйа “үс туочуканы” холбуоҕа.

Бу туһунан суруналыыстарга РФ бэрэсидьиэнин пресс-сэкирэтээрэ Дмитрий Песков иһитиннэрдэ.
“Кырдьык, телемост бэлэмнэнэр, бу туһунан Путин уонна Си Бразилияҕа көрсүһүүлэригэр дуогабардаспыттара, — диир Песков. – Барыллаан, ахсынньы 2 күнүгэр”. Ханнык эмэ уларыйыы буоллаҕына, биллэриэхпит диэтэ. Кини РФ уонна КНР баһылыктарын тус көрсүһүүлэрэ былааннамматын, гаас утаҕын холбоон үлэлэтии телемост нөҥүө ыытылларын чопчулаата.
ССТА источниктара иһитиннэрбиттэринэн, “Газпром” уонна Кытай “Сибиир күүһэ” гаас утаҕын үөрүүлээхтик үлэлэтиини, итинэн Арассыыйа гааһын Кытайга ыытыы саҕаланар күнүн ахсынньы 2 күнүгэр торумнаабыттар. Дьиҥэ, бастаан ахсынньы 20 күнүгэр былааннаабыттара.
“Сибиир күүһэ” гаас утаҕынан гаас Илин Сибиир (Саха сиригэр Чайыҥдатааҕы уонна Иркутскай уобаласка Ковыктинскайдааҕы) баайдаах сирдэриттэн Арассыыйа ис ырыынагар уонна экспорка Кытайга тахсыаҕа. “Илиҥҥи” маршрут туһунан дуогабар Кытайдааҕы CNPC кытта 2014 сыл ыам ыйын 21 күнүгэр илии баттаммыта. Гаас утаҕын экспорка оҥорон таһаарыыта – сылга 38 млрд куб. м тэҥнэһэр.

СИА.