Владимир Путин Уһук Илиҥҥи эрэгийиэннэргэ туристическэй кешбэги икки төгүл улаатыннарарга сорудахтаата

Уһук Илиҥҥи уокурук эрэгийиэннэриттэн сөмөлүөтүнэн көтүүгэ чэпчэтиилээх билиэттэр көрүллэр буоллахтарына, туристическай сыаллаах айаҥҥа туспа көмө көрүллүөҕэ. Ол курдук, бу күннэргэ РФ Бэрэсидьиэнэ Владимир Путин  РФ бырабыыталыстыбатыгар  Уһук Илиҥҥи уокурукка күүлэйдии кэлэр дьоҥҥо  путевка төлөбүрүттэн икки төгүл төннөрөр (кешбэк) туһунан толкуйдуулларыгар сорудахтаата.

«Туризмы сайыннарыахпыт. Онон сибээстээн, Уһук Илиҥҥи уокурукка көтүүгэ тустаах кешбэги икки төгүл  улаатыннарар туһунан толкуйдуулларыгар эттим. Бу хайаан да олоххо киириэхтээх”, — диэн бэҕэһээ, Космонавтика күнүгэр, Амурскай уобаласка баар «Восточнай» космодромҥа сылдьар кэмигэр эппитэ.

Онон сотору кэминэн ити эппитэ олоххо киирдэҕинэ, Уһук Илиҥҥи уокурук эрэгийиэннэригэр  туристическай путевка сыаната быдан чэпчэки буолуоҕа. Маны ситиһэргэ РФ бырабыыталыстыбата сөптөөх усулуобуйаны тэрийэрэ күүтүллэр.  Билигин баар бырагыраама чэрчитинэн,  РФ эрэгийиэннэриттэн ханныктарыгар эрэ икки күнтэн  ордук сырыттахха, туристическай путевка сыанатыттан 20 %-нын кешбэк быһыытынан төннөр, ол 20 тыһыынча солк. улаатыа суохтаах диэн.  Быйыл тохсунньуга Уһук Илини уонна Акртиканы сайыннарыыга  миниистирэ Алексей Чекунков Ростуризм уонна Илини сайыннарыыга министиэристибэтэ Уһук Илиҥҥи уокурукка барыыга путевкаларга көрүллэр кешбэги улаатыннарыыны көрүөхтээхтэрин туһунан эппитэ. Ол лимиитэ 40 тыһ. солк. диэри олохтонуохтаах.

Никита Аргылов, Уһук Илиннээҕи искусство уонна гуманитарнай наукаларга оскуолатын коммуникацияҕа уонна медиаҕа департаменын  дириэктэрэ, Владивосток куоракка олорор:

— Эрэгийиэннэр судаарыстыбаттан көдьүүстээх көмө оҥоһулларыгар наадыйаллар. Араас хабааннаах балаһыанньаттан сылтаан,  Уһук Илиҥҥи уокурукка сынньана кэлии төлөбүрэ ыарахан. Владимир Путин  быһаарыытынан туризмы өйүүргэ аналлаах кешбэк олоххо киирдэҕинэ, аччыгый биисинэс килийиэннэрэ элбиэхтэрэ. Саамай сүрүнэ, манна сытар.

Александр Тарасов, «Саха сирэ».