РФ бэрэсидьиэнэ Владимир Путин АХШ уонна кини диэки буолбут дойдулар киллэрбит араас хааччахтарыгар хоруйдаан, бэҕэһээ өссө эбии миэрэлэри киллэрдэ. Бу ыйтан саҕалаан тас дойдулар Арассыыйа гааһын солкуобайынан төлөһөр буолуохтара.
Бэрэсидьиэн ыйааҕар этиллэринэн, тас дойдулар биһиги гааспытын атыылаһалларыгар, бу иннинэ дуолларынан, евронан төлөһө олорбут буоллахтарына, билигин аны Арассыыйа бааннарыгар солкуобайынан анал счет арыйыахтара.
– Арассыыйаны утары араас хааччаҕы киллэрбит дойдуларга айылҕа гааһын туһаналларыгар дьэҥкэ уонна өйдөнүллэр схеманы киллэрдибит. Өскөтүн бу дойдулар бары дуолларынан уонна евронан төлөһө олорор, уонна өссө ол дуоллардарын, евроларын “тоҥорбута буолан” илдьэ хаалар эбит буоллахтарына, билигин ити тохтуоҕа. Дуоллары, евроны туһанар билигин суолтата суох буолла. Онон айылҕа гааһын биһигиттэн ылабыт диир буоллахтарына, хайаатар да Арассыыйа бааннарыгар анал счет арыйан, солкуобайынан төлөһүөхтэрэ. Бу схема муус устар 1 күнүттэн киириэҕэ. Өскөтүн бу ирдэбили тутуспат буоллахтарына, хантараактары тохтотуохпут, – диэн иһитиннэрдэ Владимир Владимирович бэҕэһээҥҥи мунньаҕар.
Аграфена КУЗЬМИНА