Бүгүн, ахсынньы 19 күнүгэр, РФ Бэрэсидьиэнэ Владимир Путин үгэскэ кубулуйбут улахан пресс-кэмпириэнсийэтэ буолуоҕа. Владимир Владимирович суруналыыстары кытта маннык көрсүһүүтэ 2001 сылтан саҕаламмыта. Быйыл көрсүһүү уон бэһис төгүлүн ыытыллар.
Москваҕа Аан дойдутааҕы атыы-эргиэн киинигэр ыытыллар пресс-кэмпириэнсийэҕэ Арассыыйа эрэгийиэннэриттэн эрэ буолбакка, тас дойдулар суруналыыстара эмиэ кытталлар. Сайаапкалар сэтинньи 22 күнүттэн ахсынньы 5 күнүгэр диэри бэриллибиттэрэ. Былырыын 1702 суруналыыс кыттыыны ылбыт буоллаҕына, быйыл 1895 суруналыыс аккредитацияны ааспыт. Кинилэргэ Улуу Кыайыы 75 сылыгар анаммыт анал бэлиэлээх уруучука, остуол халандаара уонна блокнот бэриллиэҕэ.
Былырыын пресс-кэмпириэнсийэ 3 чаас 43 мүнүүтэ устата барбыта. Бэрэсидьиэн барыта 53 суруналыыс 66 ыйытыытыгар хоруйдаабыта. Ордук, дойду ис уонна тас бэлиитикэтин туһунан, эрэгийэн баһылыктарын үлэлэрин сыаналыыр хабааннаах кэпсэтии буолбута.
Саамай кылгас, 1 час 35 мүнүүтэ устата буолбут пресс-кэмпириэнсийэ 2001 сыллаахха, Владимир Путин бэрэсидьиэн быһыытынан суруналыыстары кытары бастакы көрсүһүүтүгэр этэ. Оттон уһуннук буолбут пресс-кэмпириэнсийэ, 2008 сыллаахха 4 чаас 40 мүнүүтэ устата барбыта.
Быйылгы пресс-кэмпириэнсийэ маннааҕы бириэмэнэн киэһээ 18 чаастан саҕаланыаҕа. Биэриини “Россия”, “Россия-24”, “Бастакы ханаал” уонна радиостанциялар быһа эфиргэ көрдөрүөхтэрэ, иһитиннэриэхтэрэ.
Ньургуйаана Иванова, «Саха сирэ» хаһыат, edersaas.ru
Хаартыска СИА саайтыттан