Сүрүн Уопсастыба

Владимир Путин Саха сириттэн 5 киһини Бочуотунай грамотанан наҕараадалаата

РФ Бэрэсидьиэнэ Владимир Путин Саха Өрөспүүбүлүкэтиттэн  биэс киһини ойуур  баһаардарын умуруорууга быыһыыр-умуруорар үлэни кэмигэр уонна үрдүк таһымнаахтык тэрийбиттэрин иһин  Бочуотунай грамоталарынан наҕараадалаата.

Манна аналлаах ыйаах бэҕэһээ судаарыстыбаннай порталга таҕыста. Ол курдук, Саха сиригэр ойуур баһаардарын умуруорууга  быыһыыр, умуруорар үлэлэри кэмигэр үчүгэйдик ыыппыттарын түмүгэр, Сунтаар улууһун баһылыгын 1-кы солбуйааччы Николай Александров, «СӨ волонтердары кытта үлэҕэ киин» дириэктэрин солбуйааччы Айыллаан Винокуров, Дьокуускайдааҕы юридическай-полицейскай кэллиэс филиалын устудьуона Алексей Леонтьев, «Таатта  нэһилиэгэ” МТ баһылыга Егор Павлов уонна СӨ Бырабыыталыстыбатын бэрэссэдээтэлин 1-кы солбуйааччы Дмитрий Садовников тустаах грамотанан наҕараадаланнылар.

Санатар буоллахха, бу ааспыт сайын Саха сиригэр ойуур баһаардара элбэхтик тураннар, уустуктары үөскэппиттэрэ. Ойуур баһаарыттан хоромньу, быһа барыллаан ааҕыынан, 1,6 млрд. солк. тэҥнэһэр.

Түгэнинэн туһанан, Саха сирин олохтоохторун уонна «Сахамедиа» РИИХ кэлэктиибин ааттарыттан үрдүк наҕараадаҕытынан ис сүрэхпититтэн эҕэрдэлиибит. Тус олоххутугар бары үчүгэйи,  доруобуйаны баҕарабыт.

1
0