Владимир Путин ойуур баһаардарын умуруорууга суһал миэрэни ылынан иһэргэ сорудахтаата

Владимир Путин эрэгийиэннэр салайааччыларыгар ойуур баһаардарын умуруорууга  сөптөөх суһал миэрэни ылынан иһэллэригэр сорудахтаата. Мунньахха ойуур баһаардарын утары охсуһууга Саха сирин уопута этилиннэ. 

РФ Бэрэсидьиэнэ Владимир Путин бүгүн кэккэ эрэгийиэннэр салайааччыларын кытта видео-кэмпириэнсийэ көмөтүнэн ойуур баһаардарын умуруорууга аналлаах мунньаҕы ыытта. Кини бүгүҥҥү күҥҥэ дойду европейскай өттүгэр уонна Уһук Илин кэккэ эрэгийиэннэригэр ойуур баһаардара кутталлаах балаһыанньаны үөскэтэллэрин туһунан иһитиннэрдэ уонна тустаах салайааччыларга ойуур баһаардарын умуруорууга аналлаах суһал миэрэлэри уталыппакка ылынан иһэллэригэр сорудахтаата. Мунньахха  ойуур баһаардарын умуруорууга Саха сирин уопута ахтылынна.

Владимир Путин федеральнай таһымҥа ойуур баһаардарын утары охсуһууга, умуруорууга  биир систиэмэлээх быһаарыныы ылыллыбытын уонна эрэгийиэннэргэ сөптөөх үп-харчы тиэрдиллибитин туһунан иһитиннэрдэ.  «Дойду үрдүнэн билиҥҥи туругунан ааспыт сыллааҕыны кытта тэҥнээтэххэ, ойуур баһаардара туруулара үс төгүл кыра. Ол эрээри, дойду европейскай өттүгэр балаһыанньа уустук соҕус. Холобур, Рязанскай уобаласка  күүстээх тыал түһэн, ойуур баһаардара түргэнник тарҕаналлар. Сорох оройуоннарга уот көрдүгэннэрэ нэһилиэнньэлээх пууннартан 5 км сиргэ бааллара биллэр. Онон сибээстээн, ойуур баһаардарын умуруорууга суһал миэрэни ылынан иһэргитигэр сүбэлиибин. Саамай сүрүнэ, дьону харыстыырга сөптөөх миэрэни ылан иһэргит наада», — диэн Владимир Владимирович эттэ.

Ону тэҥэ, уустук балаһыанньа  Нижегородской уобаласка уонна Марий Эл өрөспүүбүлүкэтигэр баарын санатта. «Эрэгийиэннэр уонна ЫБММ-ин салайааччылара федеральнай, эрэгийиэннээҕи уонна муниципальнай таһымнарга хонтуруолу кытаанахтык тутан олороргутугар сүбэлиибин, сөптөөх миэрэни түргэнник ылынан иһэргитигэр», — диэн сорудахтаата.

Эрэгийиэннэр салайааччылара ойуур баһаардарын утары охсуһууга этиилэрин киллэрдилэр. Мунньахха Ил Дархан Айсен Николаев кыттыыны ылла. РФ айылҕа ресурсаларыгар уонна экологияҕа миниистирэ Александр Козлов Саха сирэ ойуур баһаардарын умуруорууга сөптөөхтүк үлэни ыыппытын түмүгэр,  ааспыт сылы кытта тэҥнээтэххэ, ойуур баһаара туруута 13 төгүл аҕыйаабытын туһунан иһитиннэрдэ. Санатар буоллахха, бүгүҥҥү туругунан Саха сирин үрдүнэн сэттэ ойуур баһаара баара биллэр. Былырыын баччаларга 50 ойуур баһаара күөх дуолу күл-көмөр оҥороро.