Владимир Путин науканы, технологияны сайыннарыыга уон сылы биллэрдэ

Бөлөххө киир:

РФ Бэрэсидьиэнэ Владимир Путин 2022-2031 сыллары Арассыыйаҕа наука уонна технология сылларынан биллэрэр туһунан ыйаахха илии баттаата.

Ыйаахха этиллэринэн, 2031 сылга диэри эдэр дьон науканан дьарыктаналларыгар, чинчийии үлэтин ыыталларыгар, саҥаны айан таһааралларыгар бары усулуобуйа тэриллиэхтээх, итини таһынан наука бары хайысхата сайдыахтаах. “Наука, технология оруолун уопсастыбаҕа, дойдубутугар үрдэтэр сыалтан уонна былырыын ыытыллыбыт Наука, технология сылын көрдөрүүлэрин учуоттаан туран, 2022-2031 сыллары наука уонна технология сылларынан биллэрэргэ”, – диэн этэр ыйааҕар Владимир Путин.

Санатан эттэххэ, Уһук Илин эрэгийиэннэргэ Арассыыйа наукатын академиятын 36 института баар. Манна барыта сэттэ тыһыынчаттан тахса киһи үлэлиир. РФ Бэрэсидьиэнин сорудаҕынан Владивостокка саҥаны айар-тутар анал научнай технологическай киин аһыллыаҕа. Инновационнай киин Уһук Илин быраамыысыланнай хампаанньаларыгар көмө-тирэх буолуохтаах. Бу иннинэ Владимир Путин байыаннай науканы, технологиялары сайыннарыыга бэриллэр Георгий Жуков аатынан бириэмийэни 3 мөлүйүөн солкуобайга диэри улаатыннаран турар.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0