“ Мин быһыыны, «Спутник» вакцинаны, олунньуга ылбытым. Туох да ойоҕос дьайыы баарын көрбөтөҕүм, иккис быһыыны 12 хонон баран ылбытым, онтон анализ биэрбитим үчүгэй этэ», – диэтэ Арассыыйа Бэрэсидьиэнэ Владимир Путин быһа биэриитин кэмигэр.
edersaas.ru
Москва бириэмэтинэн күнүс 12, Дьокуускай бириэмэтинэн киэһэ 6 чаастан Владимир Путин быһа биэриигэ нэһилиэнньэ ыйытыытыгар хоруйдуурун саҕалаата. Быһа эфир пандемияҕа сыһыаннаах ыйытыыттан саҕаланна: «Тоҕо вакцинациялааһын булгуччулааҕый? Тоҕо хааччахтыыр дьаһал баарын үрдүнэн улахан күрэхтэһиилэр ыытыллалларый? Владимир Владимирович, эн бэйэҥ быһыы ыллыҥ дуо?»
Дойду баһылыга пандемиянан сибээстээн хааччахтыыр дьаһал тутуһулларын, ол эрээри судаарыстыбаннай эппиэтинэстээх буолууттан эрдэттэн былааннаммыт улахан күрэхтэһиилэр ыытыллалларын эттэ. Дьаҥ маассабайдык тарҕанан, локдаун тахсыбатын, дьон үлэтэ-хамнаһа, дохуота суох хаалан, олох таһыма намтаабатын туһуттан кэккэ салааларга үлэлиир дьоҥҥо булгуччулаах вакцинацияны киллэрэр туһунан быһаарыы ылыллыбытын быһаарда.
Нэһилиэнньэттэн киирэр ыйытыылары хомуйар киин кэлиҥҥи уон күн устата тиргиччи үлэлээбит. Дойду бары эрэгийиэннэриттэн дьоннор интэриэһиргиир ыйытыыларын сервер нөҥүө «Москва, Путиҥҥа» бырагырааманан киирэн биэрэллэр. 600 000 төгүл киирбиттэр! Ону таһынан ордук кырдьаҕастар төлөпүөнүнэн эрийэн тус кыһалҕаларынан, пандемия, вакцинация, дьиэ-уот, үлэ-хамнас, социальнай эйгэ боппуруостарынан кэлэллэрин оператордар сиһилии кэпсэтэн, быһааран, ыйытыылары сааһылаан, түмэн иһэр эбиттэр. Даҕатан эттэхэ, оператордарынан волонтердар – араас идэлээх (врачтар, юристар, экономистар, социальнай үлэһиттэр, педагогтар, менеджердэр, суруналыыстар уо.д.а.) эдэр дьон үлэлииллэр.
Раиса Сибирякова, «Саха сирэ»хаһыат, edersaas.ru