Владимир Путин Ил Дархан Айсен Николаев этиитинэн, ойуур баһаарын умуруоруу үбүлээһинин саҥаттан көрөргө сорудахтаата

Муус устар 27 күнүгэр халааҥҥа уонна ойуур баһаарыгар анаммыт сүбэ мунньахха бэрэсидьиэн Владимир Путин федеральнай бүддьүөттэн ойуур баһаарын умуруорууга көрүллэр үбү эрэгийиэннэргэ тыырыы ырычааҕын саҥаттан көрөргө дьаһайда.

edersaas.ru

Владимир Путин видеокэмпириэнсийэ киэбинэн салайан ыыппыт сүбэ мунньаҕар, Саха Өрөспүүбүлүкэтин Ил Дархана Айсен Николаев ойуур баһаарын умуруорууга үбү көрүүгэ киэҥ сиринэн тайаан сытар ойуурдаах уонна баһаар турар куттала улахан эрэгийиэннэрин болҕомтоҕо ыларга эттэ.

— Арассыыйа Федерациятын үрдүнэн бу сыалга биир гектарга ортотунан 199 солк. көрүллэр, ити иһигэр Красноярскай кыраайга – 8 солк, Саха сиригэр – 6 солк. 90 харчы. Сирбит-уоппут киэҥэ бэрт буолан, баһаарынньыктар уонна ЫБММ-нар төһө даҕаны хорсуннук охсуһа сатааталлар, ойуур баһаара үгүстүк турар, – диэтэ Айсен Николаев уонна ойуур баһаарын умуруорууга көрүллэр үбү эрэгийиэннэргэ тыырыы ырычааҕын саҥаттан көрөргө эбэтэр билигин үлэлиир федеральнай бүддьүөт сокуонун кэспэт инниттэн, бу үлэни эрэгийиэн бүддьүөтүттэн үбүлүүргэ ойууру баһаартан араҥаччылааһын боломуочуйатын эрэгийиэннэргэ сыһыарарга эттэ.

Айылҕа ресурсаларын уонна экология миниистирэ Дмитрий Кобылкин ойуур баһаарын умуруоруу үбүлээһинин ырычааҕа 2006 с. оҥоһуллубутун уонна элбэх ирдэбиллэринэн олохтоммутун быһаарда. Онуоха биир сүрүн ирдэбилинэн нэһилиэнньэ ахсаана уонна ойууру туһаныы буолбут, ол Саха сиригэр охсуулаах түмүктэммит.

Бэрэсидьиэн Владимир Путин Айсен Николаев этиитин кытары сөбүлэһэрин биллэрдэ итиэннэ үбүлээһин ырычааҕын саҥаттан оҥорорго сорудахтаата.

— Ирдэбил элбэҕэ өйдөнөр, ол эрээри кэм-кэрдии иннин диэки хардыылыыр, олох усулуобуйата уларыйан иһэр. 2006 сыллаахха туох суруллубутун көрбөккө, дьэ, ону учуоттуохха наада. Бу боппуруоска болҕомтолоохтук сыһыаннаһаргытыгар көрдөһөбүн, – диэтэ Владимир Путин итиэннэ Айылҕа ресурсаларын уонна экология миниистиригэр кэккэ сорудахтары биэрдэ.

Маны таһынан бэрэсидьиэн Айсен Николаев ойуур баһаарын умуорарга үлэлиир дьону аһатыы ороскуотун федеральнай бүддьүөттэн көрөргө эппитин өйөөтө. Дмитрий Кобылкин ити хайысханан үлэ ыытылла сылдьарын эппитигэр, ону суһаллык быһаарар охсорго дьаһайда диэн Ил Дархан уонна бырабыылатыстыба пресс-сулууспата иһитиннэрэр.

Раиса Сибирякова, «Саха сирэ» edersaas.ru