Владимир Путин гаастааһын социальнай бырагыраамата 2022 сылынан бүтэрин эттэ
Гаас сүрүн үөһүттэн нэһилиэнньэлээх пууннарга гааһы босхо тардыы 2022 сылга түмүктэниэхтээх.
Эрэгийиэннэр бырайыак оператордарын талыах тустаахтар диэн Бэрэсидьиэн Владимир Путин Башкирияҕа «Цемикс» собуот үлэһиттэрин кытары көрсүһүүгэ эттэ.
– Бу гаас сүрүн үөһүттэн чугас сытар нэһилиэнньэлээх пууннарга сыһыаннаах. Ол турбаттан учаастакка диэри гаас босхо тардыллар, оттон учаастак иһинээҕи үлэни хаһаайын бэйэтэ төлүүр. Ол эрээри, манна даҕаны сыана ыараабытынан, ороскуоту аччатар туһуттан Бырабыыталыстыба типовой усулуобуйаны бэлэмнээтэ, – диэтэ Владимир Путин олорор дьиэлэргэ гааһы киллэрии туһунан Абзелиловскай оройуон олохтооҕо Розалия Булатова ыйытыытыгар хоруйдууругар.
Бырайыак федеральнай операторынан «Газпром» ПАУо анаммыта, эрэгийиэннэргэ эмиэ оператордар талыллыахтаахтар. Аттыларыгар сүрүн үөһэ суох нэһилиэнньэлээх пууннарга гааһы холбооһун гаастааһын эрэгийиэннээҕи бырагырааматынан ыытыллыаҕа.
Санатан эттэххэ, Владимир Путин Федеральнай Мунньахха быйылгы Анал этиитигэр бөһүөлэк таһынааҕы гаас ситимигэр холбоммотох дьиэлэргэ гааһы киллэриини түргэтэргэ, онуоха нэһилиэнньэттэн харчыны хомуйбакка эппитэ. (Манна 2020 сылга диэри куорат биитэр бөһүөлэк иһинээҕи гааһы үлэлэтэр ситим тардыллыбыт нэһилиэнньэлээх пууннарыгар үлэни салгыыр туһунан этиллэр. Онуоха гааһы үллэрэр ситимтэн сир учаастагар диэри 200 миэтэрэттэн ырааҕа суох, гааһы туһаныы чааска 7 куб. м элбэҕэ суох буолуохтаах). Бу бырагыраама чэрчитинэн, гаас учаастак олбуоругар диэри босхо, оттон олбуортан дьиэҕэ диэри хаһаайын суотугар тардыллар диэн ТАСС иһитиннэрэр.
Раиса Сибирякова, «Саха сирэ», edersaas.ru