Владимир Путин эрэгийиэннэргэ баһаардары умуруорууга эбии үбү көрөргө сорудахтаата

Ааптар: 
Бөлөххө киир:

Арассыыйа бэрэсидьиэнэ Владимир Путин балаҕан ыйын 1 күнүгэр диэри бырабыыталыстыба саппаас пуондатыттан эрэгийиэннэргэ ойуур баһаардарын умуруорууга эбии үбү көрөргө сорудахтаата.

Бэрэсидьиэн быйыл сайын кураан уонна олус куйаас буолан, ойуурга баһаар туруута үксээбитин бэлиэтээтэ, эбии көрүллэр үп ойуурга баһаар турар кутталын кэтээн көрүүгэ, мониториннааһыҥҥа уонна ойуур баһаарын анал тиэхиньикэтинэн, тэриллэринэн хааччыйыыга туһаайыллыаҕа диэн Кремль саайта суруйда.

Иккис сорудах Уһук Илиҥҥи федеральнай уокурук территориятыгар ойууру авиациянан араҥаччылааһын эрэгийиэннэр икки ардыларынааҕы киинин тэрийэр туһунан быһаарыыга ананна. Сорудах толоруллубутун туһунан алтынньы 1 күнүгэр диэри дакылааттаныахтаах.

Үһүс сорудах нэһилиэнньэлээх пууннартан чугас территорияларга турар уоту бохсууга ЫБММ-ы тардар туһунан боппуруоһу көрүүгэ итиэннэ эрэгийиэннэр баһаары умуруорууга туһаныллар  тиэхиньикэлэринэн, тэриллэринэн хааччыллыыларын таһымын быһаарыыга ананна. Бу боппуруостарынан дакылаат балаҕан ыйын 1 күнүгэр диэри оҥоһуллуохтаах.

Бырабыыталыстыба маны таһынан Оборуона министиэристибэтин кытары тыҥааһыннаах балаһыанньалаах эрэгийиэннэргэ баһаары умуруорууга эбии үп уонна күүс тардыллара төһө наадатын атырдьах ыйын 15 күнүгэр диэри быһаарарга итиэннэ сөптөөх быһаарыы ыларга эбээһинэстэннэ. Сорудахтар испииһэктэрэ от ыйын 21 күнүгэр, бырабыыталыстыба чилиэннэрин кытары ыытыллыбыт сүбэ мунньах түмүгүнэн, чопчуламмыта.

Авиалесоохрана иһитиннэрэринэн, атырдьах ыйын 8 күнүнээҕи чахчынан, Арассыыйа үрдүнэн 174 ойуур баһаарын (1 542 272 гектар) умуруорууга үлэ барар. Баһаар саамай улахан территорияны Саха сиригэр хаппыт.

Раиса Сибирякова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0