Владимир Путин: “Экэниэмикэбитин тупсарыыга өссө да элбэх үлэ күүтэр”

Бөлөххө киир:

Арассыыйа бэрэсидьиэнэ Владимир Путин иллэрээ күн экэниэмикэ боппуруостарыгар эмиэ биир улахан мунньаҕы ыытта. Кини манна бырамыысыланнаска болҕомтотун хатаата.

Дойду бэрэсидьиэнэ мунньаҕы ыытыан иннинэ бырамыысыланнас көрдөрүүтүгэр тох­тоото. Кини бэлиэтииринэн, түөрт ый устата Арассыыйаҕа бу эйгэҕэ 3,9% эбиллии тахсыбыт буоллаҕына, муус устар түмүгүнэн көрдөрүү бэрдэ суох.
Арассыыйа үрдүнэн бырамыысыланнаспыт оҥорон таһаа­рыыта, уопсай ылан эттэххэ, түөрт ый түмүгүнэн 3,9% үрдээбит эбит буоллаҕына, муус устары туспа ыллахха, бу ыйга көрдөрүү кыччаабыт. Массыына бырамыысыланнаһыгар, ньиэби оҥорон таһаа­рыыга, металлургия­ҕа биллэ таҥнары түһүү баар. Кэккэ боппуруостарынан туһаан­наах биэдэмистибэлэри, хампаанньалары кытары үлэ ыытан олоробут. Ол иһигэр хампаанньаларга, тэрилтэлэргэ, үлэ кэлэктиип­тэригэр көмөнү ыытыы туһунан, – диэн бэлиэтиир Владимир Владимирович.
Өскөтүн бырамыысыланнас эйгэтигэр бу сааскы көрдөрүүлэринэн арыый таҥнары түһүү бэлиэтэммит буоллаҕына, тыа хаһаайыстыбатыгар, тутууга Арассыыйа үрдүнэн биллэ сэргэхсийии таҕыста. Бу туһунан дойду бэрэсидьиэнэ инники мунньахтарыгар эмиэ бэлиэтээн турар.
Владимир Путин мунньахха үлэтэ суох буолуу ахсаана кыччаабытын эттэ. “Муус устарга дойдубут үрдүнэн үлэтэ суох буолуу көрдөрүүтэ хаһааҥҥы­тааҕар да кыччаата. Муус устарга бу көрдөрүү 4% тэҥнэспитэ. Ыам ыйыгар кэлэн өссө кыратык түспүтэ. Ол эрээри билиҥҥи кэмҥэ барыта этэҥҥэ эбит диэн ыһыктынан кэбиһэр сатаммат, үлэ ырыынага күн-түүн халбаҥныы турар. Онон бырабыыталыстыба бу боппуруоһу эмиэ болҕомто киинигэр илдьэ сылдьыҥ”, – диэн иһитиннэрдэ.
Бэрэсидьиэн экэниэмикэ боппуруостарыгар ыам ыйыгар ыыппыт мунньаҕар дойду үрдүнэн сыана түһэн эрэрин бэлиэтээбитэ. Ыам ыйынааҕы көрдөрүүнэн,
17,4 % тэҥнэспитэ.
Ыам ыйын 27 күнүнээҕи туругунан, сыана үрдээһинэ 17,4 бырыһыан этэ. Ыам ыйын иккис аҥаарыттан сыана үрдээбэккэ турар. Онон билигин көрдөрүүбүт үчүгэй. Манна даҕатан, национальнай валютабыт туһунан эттэххэ, солкуобай ырыынакка бигэргэниитэ тас дойдуга табаарбытын атыылыырга экспортердар ирдэбиллэрин сымнатта. Холобур, валютаттан ылар барыһы атыы­лааһыҥҥа 80 бырыһыантан 50-ҥа тиийэ түстэ. Ити тас дойдулары кытары үлэлэһиигэ тоҕоос­тоох кэм буолуоҕа, – диэн бэ­­лиэтиир кини.
Манна даҕатан, бэрэсидьиэн нэһилиэнньэ дохуоттаах буолуутугар болҕомтотун уурда. Санатан эттэххэ, бэс ыйын 1 күнүттэн биэнсийэ, хамнас уонна тиийинэн олоруу алын кээмэйдэрэ, ону сэргэ дьоҥҥо-сэргэҕэ бэриллэр араас көмө төлөбүрдэр үрдээбиттэрэ. Предпринимателлэргэ көмө быһыытынан нолуоктарыгар, страховой төлөбүрдэригэр чэпчэтиилэр киирбиттэрэ, төлүүр болдьохторо уһатыллыбыта. Манна эбэн бу мунньахха РФ бэрэсидьиэнэ хампаанньалар, тэрилтэлэр наадыйыыларыгар кирэ­дьиит дэбигис бэриллиэхтээҕин эттэ. Уонна түмүккэ кэлэр үс сыллаах бүддьүөтү оҥоруу номнуо саҕаламмытын бэлиэтээн туран, бырабыыталыстыбаҕа үп быраабылатын оҥорууга болҕомтону уурарыгар сорудахтаата.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0