РФ бэрэсидьиэнэ Владимир Путин дойду экэниэмикэтин сайдыытыгар ыыппыт мунньаҕар нэһилиэнньэҕэ социальнай көмө тохтуо суохтааҕын, чааһынай биисинэскэ өссө көмө оҥоһуллуохтааҕын бэлиэтээн эттэ.
Владимир Владимирович мунньаҕы ыытыан иннинэ тас дойдулар араас хааччах киллэрбиттэрэ бэйэлэрин дойдуларыгар өссө күүскэ охсубутун, Арассыыйа хааччахтары этэҥҥэ туораан иһэрин, солкуобай олунньутааҕы көрдөрүүтүгэр төттөрү түспүтүн бэлиэтээн эттэ.
– Бастакы кыбаартал түмүгүнэн көрдөххө, билиҥҥи счеппут 58 млрд дуоллары куоһарда. Бу хаһааҥҥытааҕар да үрдүк көрдөрүү буолар. Бааннар систиэмэлэригэр тас дойдулар валюталара киирэн эрэллэр, бэйэбит да дьоммут харчыларын бааннарга уурунан эрэллэрэ көстөр. Ас-үөл ырыынагар эттэххэ, билигин барыта орун-оннугар түһэн маҕаһыыннар бородууктанан хааччыллан олороллор, – диэн этэр бэрэсидьиэн.
Санатан эттэххэ, Владимир Путин дойду экэниэмикэтэ туруктаах буолуутугар анал миэрэлэри ылан турар. Уустук кэмҥэ кини ордук дьоҕус, орто биисинэскэ болҕомтотун хатаабыта.
– Ырыынагы хонтуруолга тутарга биһиги чааһынай биисинэскэ көмө оҥорбуппут сөп. Бу быһаарыныыны ылынаммыт, хас биирдии маҕаһыыҥҥа ас-үөл тохтоло суох кэлэрин хааччыйдыбыт, – диэн этэр кини мунньах кэмигэр.
Ол эрээри, Владимир Путин бэлиэтииринэн, сыана балтараа ый иһигэр 9,4 % үрдээтэ. “Сыана үрдээһинэ хас биирдии ыалга охсуулаах буолла. Онон бырабыыталыстыба, Киин баан болҕомтолоругар этэбин, нэһилиэнньэҕэ бу чааһыгар көмө тохтуо суохтаах”, – диэн бэлиэтиир кини. Манна даҕатан эттэххэ, Владимир Путин этиитинэн социальнай төлөбүрдэр, биэнсийэ, кыра хамнастаах бүддьүөт үлэһиттэрин хамнастара муус устартан үрдээн тураллар.
Бэрэсидьиэн мунньахха икки боппуруоска сүрүн болҕомтону уурарга эттэ. Бастатан туран, атыы-тутуу эйгэтигэр тас дойдулары кытары үлэлэһии боппуруостарын көрөргө сорудахтаата. Манна кини тас дойдуларга табаары таһаарыы, киллэрии өттүгэр уустуктар баалларынан, предпринимателлэргэ көмөлөһүөххэ наадатын, тас дойдулар солкуобайынан эбэтэр бэйэлэрин национальнай харчыларынан төлөһөллөрүн түргэтитии барыахтааҕын бэлиэтээн эттэ. “Бэлиэтээн этиэм этэ, билигин быһыы-майгы уларыйбыт кэмигэр биһиги өссө сайдан, үрдүк таһымы ылыахтаахпыт”, – диэн этэр Владимир Владимирович.
Иккиһинэн, бэрэсидьиэн дойду иһинээҕи ырыынагы чөл тутарга хайаатар да бүддьүөттэн көмө баар буолуохтааҕын ыйда. “Манна бүддьүөт өттүттэн уонна бизнеска кирэдьиит биэриитин чааһынан өйөбүл наада. Ити Киин баан үлэтэ, билигин баан сүрүн ставканы түһэрэн эрэр”, – диэн бэлиэтиир кини.
Аграфена КУЗЬМИНА