Владимир Путин: Донбааһы көмүскээһин уонна Арассыыйаҕа куттал суох буолуутун хааччыйыы
Олунньу бүтүүтэ Арассыыйа тас дойдуга анал байыаннай операция ыытарын туһунан биллэрбитэ. Бу тэрээһин сүрүн сыалынан Донбааһы көмүскээһин уонна Арассыыйаҕа куттал суох буолуутун хааччыйыы буоларын иһитиннэрдэ РФ бэрэсидьиэнэ Владимир Путин бэҕэһээ, Каспийскайдааҕы саммит кэнниттэн.
– Эрдэ да этэн турабын, бу анал операция сүрүн сыалынан Донбааһы уонна онно олорор дьону көмүскээһин буолар. Ону сэргэ Арассыыйабытыгар, дойдубутугар хайа да өттүнэн куттал суоһаабатын хааччыйыы буолар, онуоха бары усулуобуйа оҥоһуллуохтаах, – диэн бэлиэтиир Владимир Владимирович пресс-конференция кэмигэр.
Итини таһынан кини анал операцияны ыыта сылдьар байыаннайдарга итэҕэйэрин, кинилэргэ эрэнэрин биллэрдэ.
– Барыта былааннаммытын курдук бара турар. Түһүмэҕинэн. Билигин бу диэн хаһан түмүктэнэрин этэр уустук, ити анал операция хаамыытыттан тутулуктаах. Биһиги манна, бастатан туран, бэйэбит уолаттарбытын көмүскүөхтээхпит, кинилэр олохторугар төһө кыалларынан куттал суоһаабатын курдук байыаннай операция барыахтаах, – диэн этэр кини.
Манна даҕатан эттэххэ, бу иннинэ Арассыыйа бэрэстэбиитэлин бастакы солбуйааччы Дмитрий Полянскай ООН куттал суох буолуутун сэбиэтигэр Луганскайга, Донбааска ытыалаһыы тохтуор диэри анал операция салҕанан барыаҕа, билиҥҥитэ Киев биир остуолга олорон кэпсэтии ыытыан баҕарбат диэн иһитиннэрбитэ.
Аграфена КУЗЬМИНА