Бэҕэһээ РФ бэрэсидьиэнэ Владимир Путин Омскайга социальнай-экономическай боппуруостарга мунньах ыытта. Мунньах кэмигэр кини биэнсийэ систиэмэтигэр уларытыылары киллэриигэ тус санаатын бу күннэргэ быһа эфиргэ этиэҕин туһунан иһитиннэрдэ.
Санатан эттэххэ, Россия бырабыыталыстыбата биэнсийэ систиэмэтигэр уларытыылары киллэрэр туһунан сокуон барылын оҥорон Госдумаҕа киллэрбитэ. Парламент сокуон барылын бастакы ааҕыытынан ылыммыта. Билигин бырабыыталыстыба сокуон барылын иккис ааҕыытыгар диэри баартыйалары, профсойуустары, уопсастыбаннай түмсүүлэри, эрэгийиэннэри, уопсастыбаны кытары дьүүллэһиэхтээх. Бу боппуруоһу дойду бэрэсидьиэнэ эмиэ кыраҕы хараҕынан кэтиир.
“Бу боппуруос уопсастыбаҕа үгүс кэпсэтиини, мөккүһүүнү таһаарда. Ордук аҕа саастаах көлүөнэ биэнсийэҕэ тахсар сааһы үрдэтиини ыарыылаахтык ылынар. Ол биллэр. Ол эрээри биһиги экономиканы, үлэ ырыынагын учуоттуурбут эмиэ наада. Дойдубут уонча, сүүрбэччэ, отучча сылынан хайдах буолуоҕун толкуйдуурбут, ырытан көрөрбүт наада”, — диэн саҕалыыр мунньаҕы Владимир Владимирович.
Салгыы кини бырабыыталыстыба сокуон барылын оҥоруутугар экономическай, үп-харчы, бүддьүөт, демография көрдөрүүлэригэр олоҕурбута сөбүн, ол эрээри биэнсийэ систиэмэтигэр уларытыылары киллэрии Россия хас биирдии олохтооҕун таарыйарын, манна, бастатан туран, нэһилиэнньэ интэриэһин көрүөхтээхтэрин бэлиэтээн эттэ. “Биһиги хас биирдии быһаарыныыбыт мөлүйүөнүнэн киһи дьылҕатын таарыйар. Дьон интэриэһин бастакы уочарат көрүөхтээхпит. Онон манна күдээринэ быһаарыныыны ылынар сатаммат. Дьон хайдах, туох балаһыанньаҕа киирэллэрин барытын ымпыгар-чымпыгар тиийэ ырытан көрүөҕүҥ”, — диэн этэр кини.
Онуоха аҕа көлүөнэ үлэтин быраабын көмүскээһин, медицинскэй көмөҕө наадыйыытын, социальнай харыстабылын барытын инники түһэн эрдэлээн көрүү баран иһиэхтээҕин бэлиэтээн эттэ.
“Өскөтүн биэнсийэ систиэмэтигэр уларытыылары киллэрэр буоллахпытына, аҥаардас бүгүҥҥү күнү көрүү, биир уонча сыл үп-харчы өттүнэн туруктаах буолууну эрэ буолбакка, дьон-сэргэ олоҕо тупсуутугар, билигин биэнсийэҕэ олорор уонна кэлэр көлүөнэ интэриэстэрин көмүскээһиҥҥэ үлэни туһулуохтаахпыт. Мин манна тус санаалаахпын. Онтубун сааһыланан баран бу күннэргэ, баҕар сарсын, иһитиннэриэҕим”, — диэн этэр Владимир Путин.
Аграфена КУЗЬМИНА, “Саха сирэ” хаһыат.