– Экватортан аҕалыллыбыт банаан сыаната 70 солкуобай, оттон ыаллыы уобаластан кэлбит моркуоп сыаната 110 солкуобай, тоҕо манныгый? – диэн ыйытыы Арассыыйа Бэрэсидьиэнин быһа биэриитин кэмигэр киирдэ.
edersaas.ru
Онуоха Владимир Путин кэлиҥҥи уон сылга аһылык табаарыгар сыана аан дойдутааҕы индексэ саамай үрдүк планкаҕа турарын быһаарда. Арассыыйа глобальнай экэниэмикэ быстыспат сорҕото буолан, биһиэхэ ити эмиэ дьайарын, итиннэ ковид содула, үлэ миэстэтин сарбыйыы, сорох кэккэ дойдулар эбии харчы бэчээттээбиттэрэ эпсэрин эттэ.
– Былырыын күһүн саахар сыаната 41 % үрдээбитэ, салгыы мас арыыта ыараабыта, – диэтэ Владимир Путин. – Бырабыыталыстыба сыананы тутарга кэккэ дьаһаллары ылан, табаары оҥорооччулары уонна батарааччылары кытары сөбүлэһиилэр түһэрсиллибиттэрэ, субсидиялар көрүллүбүттэрэ, тастан киирэр табаарга пошлина үрдэтиллибитэ. Ити курдук, сыана үрдээһинигэр судаарыстыба болҕомтотун уурар эрээри, дьаһал хойутаан ылыллара эмиэ баар. Үүт сыаната бигэтик турар буолан, арыы сыанатын үрдээһинэ 3,5-5 % буолбута, ити инфляция таһымыттан кыра, инфляция 6 %-ҥа тиийбитэ. Былырыын хортуоппуй тиийбэтэҕэ, 19 мөлүйүөн туонна хостоммута, быйыл 22 мөлүйүөн туоннаны хостуурга соруктанабыт. Көтөр уонна сибиинньэ этинэн толору хааччынабыт, оттон фруктаҕа боппуруос быһаарылла илик. Ааспыт сыл түмүгүнэн тыа хаһаайыстыбата экспортка 30 млрд доллар суумалаах табаары батарда, өтөрүнэн маннык көрдөрүү ситиһиллэ илигэ. Онон, салааны өйөөһүн үчүгэй түмүктэри биэрэр, ол эрээри табаар бары көрүҥэр буолбатах.
Раиса Сибирякова, «Саха сирэ» хаһыат, edersaas.ru