Владимир Путин: «Арассыыйа аан дойду ырыынагар 50 мөл туонна бурдугу атыылыыр кыахтаах»

Санкт-Петербурдааҕы экэниэмикэ форумугар Владимир Путин Арассыыйа бу сайын туорахтаах бурдугу уонна уоҕурдуулары аан дойду ырыынагар атыыга таһаарыыны биллэрдик улаатыннарыан сөбүн туһунан биллэрбитэ.

«Арассыыйа бэйэтин ас-үөл өттүнэн толору хааччыйар буолан, тас дойдуларга бородууктаны атыыга таһаарыыны балачча улаатыннарар кыахтаах. Холобур, кэлэр сезоҥҥа бурдугу тиэйии кээмэйэ 50 мөл. туоннаҕа тиийэ элбиэн сөп. Бастатан туран, хоргуйар кутталлаах Африка уонна Чугас Илин эрэгийиэннэригэр бурдугу тиэрдиэхпитин сөп”, —  диэн дойдубут бэрэсидьиэнэ быһаарбыта .

Кини этэринэн, сааҥсыйаттан үөскээбит балаһыанньа аан дойду үрдүнэн хоргуйуу үөскүүрүн күүһүрдэр сыаллаах. АХШ бастаан утаа Арассыыйаҕа оҥоһуллар минеральнай уоҕурдуулары эмиэ сааҥсыйа испииһэгэр киллэрэн баран, суһаллык көтүрбүтэ. Оттон Дьобуруопа Холбоһуктаах дойдулара уоҕурдууну утары ылыллыбыт сааҥсыйаны көтүрэргэ олох ыксаабаттар. “Сааҥсыйа сэриитэ” аан дойду эргиэнигэр улахан урусхаллаах дьайыылаах буоларыгар ким даҕаны саарбахтаабат.