Владимир Путин баһаары умулларыы үбүлээһинин Саха сирин баһылыгын туруорсуутун кэннэ хаттаан көрөргө сорудахтаата
Арассыыйа Бэрэсидьиэнэ Владимир Путин эрэгийиэннэргэ халаан уутун уонна баһаардар балаһыанньаларыгар сүбэ мунньаҕын түмүгүнэн, РФ Бырабыыталыстыбатыгар кэккэ сорудахтары биэрдэ. Ити испииһэккэ Саха Өрөспүүбүлүкэтин Ил Дархана Айсен Николаев этиитинэн ойуур баһаардарын умулларыыга федеральнай үбү тыырыы ньыматын хаттаан көрүү киирдэ.
edersaas.ru
Бу иннинэ Бэрэсидьиэни кытта сүбэ мунньахха Саха сирин баһылыга тустаах үбү тыырыы эрэгийиэннэр икки ардыларыгар араастаһарын ыйбыта.
“Арассыыйа Федерациятыгар ортотунан бу сыалга биир гектарга 199 солкуобай көрүллэр. Красноярскай кыраайга 8 солкуобай, Саха сиригэр биир гектарга – 6 солкуобай 90 харчы. Сүҥкэн сирдээх уоттаах сиргэ ойуур баһаара элбэхтик тахсар”, — диэбитэ Айсен Николаев Бэрэсидьиэҥҥэ.
Үбү тыырыы ньымата 2006 сыллаахха ылыныллыбыта, ити ааҕыы нэһилиэнньэ төһө тарҕанан олоруутунан уонна ойууру баһылааһыны кытта сибээстээҕэ. Бэрэсидьиэн эрэгийиэннэр дьиҥнээх наадыйыыларыгар сөп түбэһэр гына ньыманы сүрүннүүрү бэлиэтээбитэ.
Маны сэргэ Айсен Николаев баһаарынайдары, быыһааччылары уонна баҕа өттүнэн умулларааччылары босхо аһылыгынан хааччыйарга этии киллэрбитэ.
Бу миэрэлэри олоххо киллэрии сорудахтар бастакы пууннарыгар киирдэ – аһылык уонна босхо уу боппуруоһун Владимир Путин бэс ыйын 1 күнүгэр диэри быһаарарга соруйда.
От ыйын 1 күнүгэр диэри РФ бырабыыталыстыбата РФ субъектарын судаарыстыбаннай былааһын уорганнарыгар бэриллибит ойуурга сыһыаннаах Арассыыйа Федерациятын сорох боломуочуйаларын олоххо киллэриигэ федеральнай субвенциялары тыырыы ньыматын чопчулуохтаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА, “Саха сирэ” хаһыат, edersaas.ru
Хаартыска: интэриниэттэн