Бүгүҥҥүттэн ТАСС «Владимир Путиҥҥа 20 ыйытыы» диэн бырайыагы саҕалаата. Дойду бэрэсидьиэнэ дьону долгутар уонна интэриэһиргэтэр сүүрбэ ыйытыыга хоруйдуур.
Видео-устуулар нэдиэлэҕэ үстэ-түөртэ тахсыахтара диэн былаанныыллар. Онон бырайыагы толору кулун тутар 26 күнүгэр биирдэ көрүөхпүт. Биэриини суруналыыс Андрей Ванденко ыытар.
Бүгүн, олунньу 20 күнүгэр, бэрэсидьиэн бастакы ыйытыыга хоруйа ТАСС-ка таҕыста:
— РФ бырабыыталыстыбатыгар саҥардыллыы үлэлэрэ 2018 сыллаахха буолбуттара. Дворкович, Шувалов, Мень уурайбыттара, кинилэр атын дьонунан солбуйуллубуттара. Бу балтараа сыл иһигэр туох буолла?
Владимир Путин хоруйа:
— Бастатан туран, бу балтараа-икки сыл иһигэр өссө элбэх уларыйыы буолуон сөп этэ. Иккиһинэн, бырабыыталыстыба урукку састааба национальнай бырайыактар олоххо киириилэрин бастакы түһүмэхтэрин бэлэмнээһиҥҥэ элбэх үлэни ыыппыта. Бу манан сайдыы сыалларын быһаарыахха наада этэ. Бастаан көрдөххө эрэ судургу курдук, дьиҥэ, бу олус улахан үлэ буоллаҕа. Онтон бу сыаллары ситиһэргэ араас хайысхаларынан үлэлэр барыахтарын наада этэ. Маны урукку бырабыыталыстыба эмиэ ситиспитэ. Оттон мин санаабар, бу хамсааһын салгыы барарыгар саҥалыы көрүүлээх-истиилээх, түмүктүүр түһүмэххэ диэри тиэрдэр дьон үлэлиэхтээхтэр. Маныаха урукку састаап улахан аҥаара бырабыыталыстыбаҕа хаалбытын бэлиэтээн этиэхпин баҕарабын. Бэрэсидьиэн дьаһалтатыгар национальнай бырайыактарынан дьарыктаммыт дьон бырабыыталыстыбаҕа көстүлэр. Бу маны мин улахан суолталааҕынан ааҕабын. Тоҕо диэтэххэ, бырайыактары иһиттэн бэлэмнээбит дьон бырабыыталыстыба таһымыгар тахсан, былааннары олоххо киллэриэхтэрэ турдаҕа.
Маны сэргэ дойду бэрэсидьиэнэ РФ бырабыыталыстыбата астаапкаҕа барарын эрдэ билэрин, саҥа соруктары туруорбутун, Дмитрий Медведевтиин доҕордуу сыһыаннаахтарын о.д.а. кэпсээтэ.
Биэриини сиһилии манна көрүҥ:
Айтана Аммосова бэлэмнээтэ, edersaas.ru