Бэҕэһээ дойду бэрэсидьиэнэ Владимир Путин эрэгийиэн баһылыктарын кытта селекторынан мунньаҕы ыытта. Ол иннинэ тэлэбиисэринэн тахсан, коронавируһунан сибээстээн туох миэрэ ылылларын эттэ, нэһилиэнньэҕэ санаатын тиэртэ.
edersaas.ru
Билиҥҥи курдук үгүс тэрилтэлэр дьиэҕэ олорор кэмнэригэр, биисинэстээх дьон улахан уустуктары көрсөллөр. Маныаха дойду бэрэсидьиэнэ бырабыыталыстыбаҕа, эрэгийиэннэргэ чопчу сорудахтары биэрдэ.
Бастакытынан, эрэгийиэннэр икки ардыларынааҕы тырааныспар, таһаҕас, дьону таһар сырыыны саппаттарыгар эттэ. Барыларын биир халыыпка киллэрэр быһаарыы суох диэтэ. “Дойду киин куоратын үгүс хампаанньалара үлэлии тураллар эбэтэр ыраахтан үлэлииргэ көстүлэр. Билигин хампаанньалар, тэрилтэлэр, урбаанньыттар үлэ кыраапыгар (нормальнай) төннөллөрүгэр усулуобуйа тэрийиллиэхтээх. Хатылаан этэбин, маны толкуйдаан уонна кичэллээхтик, түгэни болҕомтолоохтук кэтээн көрөн оҥоһуллуохтаах. Үрдүк кутталлаах буолан үлэлэрэ хааччахтаммыт тэрилтэлэр чопчу, өйдөнөр испииһэктэрэ баар буолуохтаах. Атын тэрилтэлэри араас ыспыраапкаларынан, быһаарыыларынан уонна сөбүлэҥнэринэн көмүмэҥ (грузить). Кинилэр, биллэн турар, туох баар санитарнай ирдэбиллэри уонна куттал суох буолуутун хааччыйар нуормалары тутуһан үлэлэрин салҕыахтарын сөп”, — диэн эттэ. Эрэгийиэн баһылыктарыгар туһаайан, хас биирдии тэрилтэ кыһалҕатын көрүҥ, туруктаах буолууларын хааччыйарга, үлэлээх буолуу оннунан хааларыгар көмөлөһүҥ, чопчу быһаарыылары көрдөөҥ диэн эттэ.
Оттон федеральнай таһымҥа туһаайан маннык саҥа быһаарыылары ыйда:
Бастакытынан, аччыгый уонна орто биисинэскэ социальнай төлөбүр кээмэйин икки төгүл (30-тан 15 бырыһыаҥҥа) түһэрбиттэрэ. Маны тэрилтэ үлэһиттэрин хамнаһын төлүүрүгэр эбии кыах үөскээтин диэн дьаһаммыттара.
Ыксаллаах, эбии көмө быһыытынан эмсэҕэлээбит бары аччыгый, орто биисинэс тэрилтэлэригэр социальнай фондаҕа страховой төлөбүрдэригэр алта ыйга диэри уһатыыны (отсрочка) биэрэргэ этии киллэрдэ.
- Аччыгый уонна орто биисинэс тэрилтэлэригэр НДС-тан ураты бары нолуокка эмиэ 6 ыйга уһатыыны (отсрочка) көрбүттэр.
- РФ Барыбыыталыстыбатыгар уонна Киин бааҥҥа биэс күн иһигэр биисинэһи өйүүр эбии бырагырааманы бэлэмнээҥ диэн эттэ. Бу хампаанньалар төһө кыалларынан үлэлээх буолууну, үлэһиттэр дохуоттарын оннунан хаалларалларыгар туһаайыллыахтаах диэтэ.
Бастатан туран, үлэһит ахсаанын оннунан хаалларар хампаанньаларга көмөлөһөр сөптөөх буолуо диэн ыйда. Дьон үлэтэ суох хаалар түгэнигэр, быһаччы дохуота кыччаабыт оҕолоох ыалга, уруккутун курдук кирэдьииттэрин төлүүр кыаҕа суох дьоҥҥо көмөлөһүөхпүт диэн эттэ.
Людмила ПОПОВА, edersaas.ru