Владимир Путин быһа биэриитин кэнниттэн Ил Дархан санаатын үллэһиннэ
Бэҕэһээ, дойду баһылыга Владимир Путин быһа биэриитин кэнниттэн СӨ Ил Дархана Айсен Николаев санаатын үллэһиннэ. Ол курдук, Өлүөнэ өрүһү туоруур муоста тутуутун бэрэсидьиэн бэйэтэ көтөхпүт түгэнигэр, бу улахан боппуруос түргэнник быһаарыллыан сөбүн бэлиэтээтэ.
edersaas.ru
«Федеральнай киин сорох салайааччылара муоста тутуутун төһө даҕаны утарсыбыттарын иһин, бэрэсидьиэн муостаны уһаппакка-кэҥэппэккэ тутар наадалааҕын чуолкайдык эттэ. Дойду баһылыгын сорудаҕынан өрөспүүбүлүкэ кэккэ федеральнай министиэристибэлэри кытта муоста тутуута экэниэмикэ, тырааныспар, социальнай эйгэ сайдыытыгар туох суолталааҕын бэлэмнээтэ. Хас да министиэристибэ бу бырайыагы олоххо киллэрэргэ сөбүлэһэллэрин туһунан түмүк оҥорбуттара. Онон, бэрэсидьиэн этиитин кэнниттэн муоста тутуутун боппуруоһа түргэнник быһаарыллыа диэн эрэнэбин«, — диэтэ Айсен Николаев.
Салгыы кини муоста тутуута биир эрэ куоракка наада диэн этэр федеральнай чунуобунньуктар сыыһалларын чуолкайдаата. «Бу бырайыагы ааҕан-суоттаан көрөргө биһиги муоста тутуута өрөспүүбүлүкэни киэҥник хабар диэн федеральнай кииҥҥэ туруорсабыт. Өлүөнэ эбэни туоруур муоста тутулуннаҕына, Сахабыт сирин нэһилиэнньэтин 80% сылы эргиччи хаайтарбакка үлэлиир тырааныспар ситиминэн хааччыллыа этэ. Ол аата, муоста Дьокуускайга тиийэн бүтэн хаалар «тупик» буолбатах. Мииринэйтэн Дьокуускайга диэри төгүрүк сыл үлэлиир «Бүлүү» айан суола тутуллан бүттэҕинэ, арҕаа улуустар эмиэ хабыллыа этилэр», — диэн эттэ Ил Дархан.
Оттон «Доруобуйа харыстабыла» национальнай бырайыак чэрчитинэн, өрөспүүбүлүкэ кытыы сытар ыраах нэһилиэктэригэр 70 тахса биэлсэрскэй-акушерскай саҥа пууннар тутуллуохтара. Эргэрбит уонна саахалланар туруктаах пууннары Доруобуйа харыстабылын министиэристибэтин реестригэр киллэрэн, кинилэри саҥардарга федеральнай киинтэн үп-харчы көрүллэрин туһугар кэпсэтии бара турар.
«Итиэннэ доруобуйа харыстабылын эйгэтигэр үп-харчы тиийбэтин былырыыҥҥа диэри Бырабыыталыстыба өрөспүүбүлүкэ бүддьүөтүттэн үбүлүүр этэ. Оттон быйыл бэрэсидьиэн уонна РФ Бырабыыталыстыбатын бэрэссэдээтэлин быһаарыытынан, балаһыанньа уларыйан, 2019 сылтан доруобуйа харыстабылыгар сыл ахсын эбии 60 миллиартан тахса үп көрүллэр буолла. Онон медиктэр хамнастара үрдээбитин уонна искэн ыарыыны эмтииргэ сөптөөх усулуобуйаны тэрийиини ити киирэр үп-харчы хааччыйыа. 2018 сылы кытта тэҥнээтэххэ, доруобуйа харыстабылыгар үтүмэн үп көрүлүннэ«, — диэн быһаарда Айсен Николаев.
Марианна Тыртыкова, «Саха сирэ», edersaas.ru