Владимир Путин Өлүөнэҕэ муоста тутуутун боппуруоһун үөрэтэргэ сорудахтаата
Дойду бэрэсидьиэнэ Арассыыйа бырабыыталыстыбатыгар Өлүөнэни туоруур муоста тутуутун боппуруоһун үөрэтэргэ сорудахтаабытын туһунан Илиҥҥи экэнэмиичэскэй форумҥа Ил Дархан э.т. Айсен Николаев иһитиннэрдэ.
edersaas.ru
— Өлүөнэни туоруур муоста тутуутун бырайыага Саха сиригэр эрэ буолбакка, дойду Хотугулуу-Илиҥҥи өттүгэр улахан суолталаах. Өрөспүүбүлүкэ бу хайысхаҕа көхтөөхтүк үлэлиир. Атырдьах ыйын 29 күнүгэр буолбут көрсүһүүгэ Владимир Путин Арассыыйа бырабыыталыстыбатыгар араас этиилэри үөрэтэргэ сорудахтаабыта. Ити чэрчитинэн биһиги Өлүөнэни туоруур муоста тутуутун бырайыагын бэлэмнээһиҥҥэ партнердары көрдүүбүт. Бастакы этиилэри Арассыыйа «ВИС» корпорацията уонна Кытайтан CRCC (China Railway Bridge Engineering Bureau Group Co. Ltd.) хампаанньа оҥороннор, бүгүҥҥү форумҥа үс өрүттээх сөбүлэһиини түһэристибит, маны таһынан атын да варианнары үөрэтиэхпит, — диэтэ суруналыыстарга Айсен Николаев.
Саха Өрөспүүбүлүкэтигэр массыына суолун инфраструктуратын оҥоруу бырайыагар өрүттэр бииргэ үлэлииллэрин туһунан этиллэр бу сөбүлэһиигэ Ил Дархан Айсен Николаев, «ВИС» корпорация Дириэктэрдэрин сэбиэтин бэрэссэдээтэлэ Игорь Снегуров, CRCC хампаанньа Дириэктэрдэрин сэбиэтин бэрэссэдээтэлэ У Цзяншунь илии баттаатылар. «ВИС» корпорация Дьокуускайга номнуо уон икки социальнай эбийиэк тутуутугар үлэлии сылдьар. Оттон CRCC хампаанньа Кытай Народнай Өрөспүүбүлүкэтин судаарыстыбаннай баайы-дуолу салайар уонна хонтуруоллуур Кэмитиэтинэн иһинэн үлэлиир, массыына суолун, тимир суолу, муостаны, метрону, тоннелы оҥорууга идэтийэр, сүүстэн тахса дойдуга бизнестээх. Ааспыт ыйга «ВИС» уонна CRCC тырааныспар инфраструктуратын сайыннарыы бырайыагын олоххо киллэриигэ консорциуму тэрийэр туһунан сөбүлэһиини түһэрсибиттэрэ.
— Кытай биир бөдөҥ хампаанньатын үлэҕэ тардыы өрөспүүбүлүкэ бөдөҥ инвестиционнай бырайыактары олоххо киллэрэригэр тирэх буолуоҕа, — диэтэ «ВИС» корпорация Дириэктэрдэрин сэбиэтин бэрэссэдээтэлэ Игорь Снегуров.
— Биһиги «ВИС» хампаанньаны кытары үлэбитин саҥа таһымҥа таһаарыахпытын баҕарабыт. Саха сирин курдук сайдыыга улахан потенциаллаах эрэгийиэҥҥэ уопуппут, кыахпыт туһаныллыаҕар эрэнэбит, — диэтэ У Цзяншунь.
Раиса Сибирякова, «Саха сирэ» edersaas.ru.