Владимир Прокопьев: “Судаарыстыба чөл туруктаах тулалыыр эйгэ туһугар эппиэтинэһи сүгүөҕэ”
Буолаары турар Бүтүн Арассыыйатааҕы куоластааһыны көрсө норуодунай дьокутаат Владимир Прокопьев бэйэтин санаатын үллэһиннэ.
edersaas.ru
— Мин сиргэ сыһыаннаһыыга, айылҕа ресурсаларыгар уонна экологияҕа сис кэмитиэти салайар Саха Өрөспүүбүлүкэтин норуодунай дьокутаатын быһыытынан тулалыыр эйгэҕэ сыһыаннаах уларытыыларга тохтуохпун баҕарабын.
2018 сыллаахха Бүлүү өрүс умнаһыгар экологияҕа иэдээн содулун туоратыыга быһаарыныылары ылыныыга үгүскүт көхтөөхтүк кыттыбыта. Төрөөбүт Сахабыт сиригэр Бүлүү экологията сир баайын хостооһунунан сибээстээн куруук болҕомтону эрэйэр. Онон бу Арассыыйа Төрүт сокуонугар киллэриллэр көннөрүүлэр судаарыстыбаннай былаас уорганнарын тулалыыр эйгэҕэ кыһамньыларын күүһүрдэргэ эбээһинэстиэҕэ. Итинэн сибээстээн, судаарыстыбаннай уорганнар экология иһин ирдэбиллэрэ күүһүрүө. Онон судаарыстыба тулалыыр эйгэ чөл туруктаах буолуутугар уонна көтөр-сүүрэр, хамсыыр харамай, от-мас эгэлгэ арааһын харыстыырга эппиэтинэһи сүгүөхтэрэ, ону сэргэ экологическай үөрэхтээһини киэҥник тэнитэн, дьон үүнээйигэ, тулалыыр эйгэҕэ уонна кыылга-сүөлгэ, хамныыр харамайга эппиэтинэстээх сыһыаны олохтуохтара. Дойдуга уопсастыбаннай тэрилтэлэр аптарытыаттара үрдээн, былаас уонна экологтар үгүс кыһалҕалары тэҥҥэ быһаарыахтара.
Биһиги сүрүн сорукпут – Сахабыт сирин ураты кэрэ айылҕатын харыстааһын. Бу барҕа баайы оҕолорбут уонна сиэннэрбит көрүөхтээхтэр. Маны дойду Сүрүн сокуонугар уларытыылары ылар түгэммитигэр ситиһиэхпит – балар Конституция нуормаларыгар олоҕуран айылҕаны харыстыахтара уонна экологическай үөрэхтээһини сайыннарыахтара, оттон тулалыыр эйгэни ханнык баҕарар киртитии – Конституцияҕа сөп түбэспэт.
Мин Саха сирин олохтоохторун Арассыыйа Федерациятын Конституциятыгар көннөрүүлэри өйүүргүтүгэр ыҥырабын.
Владимир Прокопьев,
Саха Өрөспүүбүлүкэтин Судаарыстыбаннай Мунньаҕын (Ил Түмэн)
сиргэ сыһыаннаһыыларга, айылҕа ресурсаларыгар
уонна экологияҕа сис кэмитиэтин бэрэссэдээтэлэ
Сахагов саайтан
Бэлэмнээтэ: Женни СТРЮКОВА
Хаартыска: тустаах саайтан