Владимир Поскачин: «Үөһээ Бүлүү куораттыы тииптээх бөһүөлэккэ кубулуйуохтаах»
Ил Дархан Айсен Николаев үөһээ бүлүүлэргэ үөрүүлээх да, күүтүүлээх да сонуну эттэ. Ол курдук, кэлэр үс сыл устатыгар федеральнай бүддьүөттэн 700-кэ мөлүйүөн солкуобай биэрэк сууллуутун тохтотор үлэҕэ көрүллэр буолла. Бу туһунан улуус баһылыга Владимир Поскачин санаатын маннык үллэһиннэ:
«Бу биэрэкпит сууллуута өссө мин пионер эрдэхпиттэн саҕаламмыта диэтэхпинэ албынныам суоҕа. Ол курдук, урут футболлаан тэбэр киэҥ хонуубут сыл аайы кэрбэнэн дьон-сэргэ хараҕын ортотугар сууллан барбыта. Мин ыччат эрдэхпинэ өссө биэрэк устун ыскамыайкалар туралларын, аллараа түһэр бетоннай кирилиэс баарын өйдүүбүн. Аармыйаттан кэлбитим ол ыскамыайкалар да, ол кирилиэс да суох буолбуттар этэ. Биэрэк сиҥнэн барыта баран хаалбыт этэ. Ол аата түөрт уонча сыл устатын тухары биэрэкпит кыра-кыралаан суулла турбут. Кэнники ити арыы кумахпыт эмиэ хамсаата, ону кытта тэҥҥэ биэрэк сууллуута түргэтээтэ. Ол иһин биэрэги бөҕөргөтөр бырайыактары оҥотторуу, олору эспэртиисэни аһардыы саҕаламмыта. Уонча сыл икки бырайыак оҥоһулунна, хастыы эмэ экспертиза ааста. Ол гынан баран син биир туох эмит сылтах көстөн кыаллыбат буолан иһэрэ.
Былырыын Саха Өрөспүүбүлүкэтин экологиятын миниистирэ Сахамин Миланович бэйэтэ дьарыктанан эрэ эспэртиисэбит бары моһолу ааһан, Москваҕа Арассыыйа экологиятын министиэристибэтин бэрэбиэркэтин ааһан баран бүддьүөт оҥоһуутун саҕана киирбэккэ хаалбыта. Бу сырыыга чопчу үп министиэристибэтэ аһарбатах диэн чуолкайдык билбиппит. Ону быйылгы быыбар саҕана Данчикова Галина Иннокентьевна кэлэ сырыттаҕына эппиппитигэр, тута Арассыыйа үбүн миниистиригэр суруйбут этэ. Онно эһиилги сылга 200 мөлүйүөн солкуобай бүддьүөт былааныгар киирдэ диэн эппиэт кэлбит этэ.
Онтон бүгүн бырайыак суумата барыта көрүллүбүтүн туһунан Ил Дархантан истэммит үөрүүбүт өссө үрдээтэ. Билигин күүстээх бэдэрээтчит булуохтаахпыт уонна бу үлэни ити үс сыл иһигэр бүтэриэхтээхпит. Ол кэнниттэн Ил Дархан өйөөтөҕүнэ, дьиҥнээх куораттыы набережнай, Октябрьскай уулуссаҕа баар аппаны туоруур муоста тутуллуохтаах. Уопсайынан Үөһээ Бүлүү куораттыы тииптээх бөһүөлэккэ кубулуйуохтаах», — диэн Үөһээ Бүлүү улууһун баһылыга Владимир Поскачин санаатын эттэ.
ulus.media саайтан.