Кулун тутар 1-2 күннэригэр Үөһээ Бүлүүгэ ыытыллыбыт «XXI үйэҕэ саха норуотун духуобунаhын саҥа саҕахтара» өрөспүүбүлүкэтээҕи форумҥа 400-тэн тахса киhи кытынна.
Александр ТАРАСОВ, «Саха сирэ» хаһыат, https://edersaas.ru
Форумҥа идэни үрдэтиигэ куурустар, маастар-кылаастар, быыстапкалар ыытылыннылар. Быйыл сайын Үөһээ Бүлүүгэ ыытыллыахтаах Манчаары оонньууларын көрсө бу иннинэ ыыппыт улуустар бэрэстэбиитэллэрин кытта көрсөн уопут атастастылар.
Духуобунас форумун чэрчитинэн ыытыллыбыт эр дьон секцията бэрт интэриэһинэйдик ааспыт. Ол курдук, эр киһи оруолун уопсастыбаҕа үрдэтии уонна уол оҕону иитии боппуруостар тула бэрт сэргэх кэпсэтии буолбут. Бу кэпсэтиини Үөһээ Бүлүү улууһун баһылыга Владимир Поскачин иилээн-саҕалаан ыытта. Кэпсэтии түмүгэр өрөспүүбүлүкэ үрдүнэн эрдэ тэриллибит аҕалар түмсүүлэрин үлэлэрин өссө кэҥэтэргэ ыйдылар. Эдэр уолаттарга уонна сулумах, ускул-тэскил сылдьар эр дьону кытта үлэни күүһүрдэргэ ыйбыттар.
Сардаана Петрова, улуус култуураҕа управлениетын начаалынньыга:
– Форумтан нэһилиэнньэ элбэҕи туһанна. Бэйэлэригэр бүгэн олорбокко, 9 улуустан кэлбит араас идэлээх дьону кытта ирэ-хоро кэпсэтэн, элбэҕи биллилэр-көрдүлэр. Дьон-сэргэ астынан, махтанан тарҕастылар, үс күн буолбута буоллар диэччилэр кытары бааллар.
Манчаары оонньууларынан сибээстээн эрэ буолбакка, инники өттүгэр маннык хабааннаах тэрээһиннэр өрүү ыытыллыахтарын наада. Саамай сэргиирим диэн, форумҥа эдэр дьон көхтөөхтүк кытыннылар. Күннээҕи олоххо туһалаах сүбэлэри иһиттилэр. Сахалыы таҥаһы тигии лекциятыгар сылдьыбыт кэрэ аҥардар харчыга атыылаһар таҥас киэптэрин, сүбэлэри босхо ылбыттарыттан астыммыттарын биллэрдилэр. Иискэ талааннаах, иистэниэн баҕалаах дьахталлар бэйэлэрэ анал бөлөх тэринэн бииргэ үлэлииргэ сананан тарҕастылар.
Итини тэҥэ, форум кыттыылаахтара Исидор Барахов аатын Дьокуускайдааҕы тыа хаһаайыстыбатын академиятыгар иҥэрэргэ этии киллэрдилэр уонна ону толору өйүүллэрин биллэрдилэр.