Владимир Михайлов: «Оптуобуска үлэлиир эппиэтинэһэ сүүс төгүл үрдүк»
«Саха сиригэр саҥа оптуобус бөҕөтө кэллэ, ол эрээри биир да саха дьоно манна үлэлиэн баҕарбат. Хамнаһа 90 тыһыынча солкуобай” диэн сурах бу сааһы быһа батсаап ситимигэр тарҕаммыта.
ЯПАК-Дьокуускайдааҕы дьону тиэйэр тырааныспар хампаанньатын оптуобуһун суоппарын кытта кэпсэтиини билиһиннэрэбин. Хаҥалас улууһун Тиит Арыытыттан төрүттээх Владимир Михайлов үлэтин быыһыгар миигин кытта кэпсэттэ.
– Владимир Владимирович, ити батсаап ситимигэр тарҕанар сурах чахчы дуо, тоҕо дьон оптуобус суоппарынан үлэҕэ киирэн испэтий?
– Суоппар идэлээхтэр таһаҕас тиэйэр массыынанан быдан элбэх харчыны өлөрөр кыахтаахтар, ол иһин кэлбэттэр дии саныыбын. Оттон батсаап ситимигэр тарҕаммыт сурах төһө кырдьыгын билбэппин. Саха АССР 100 сылынан кэлбит саҥа оптуобустарбыт тиэхиньиичэскэй көрүүнү ааһа сылдьаллар. Саҥа оптуобуска дьону тиэйэр ааттаах буоллаҕа дии, дьон да үөрэ-көтө айанныа этэ. Оптуобус суоппара диэн эттэххэ дөбөҥ. Бу олус уустук үлэ. Мин билигин эргэ оптуобуска үлэлиибин. Суоппар киһи массыынаны ыытарын таһынан, барытын бэйэтэ оҥостор, көрүнэр. Дьону тиэйэр тиэхиньикэҕэ үлэлиир эппиэтинэһэ сүүс төгүл үрдүк.
– Эн оптуобус суоппарынан хаһааҥҥыттан үлэлиигин. Туох уустуктары көрсөҕүн. Билигин дьон бырайыаһын терминал нөҥүө төлүүр буолан, үлэ хаамыыта төһө эмит чэпчээтэҕэ буолуо.
– ЯПАК тэрилтэҕэ 2013 сыллаахха кэлбитим. Куорат таһынааҕы дэриэбинэлэр икки ардыларыгар сүүрэр маршруттаахпын. Ханнык баҕарар үлэҕэ буоларын курдук, уустук элбэх, тиэхиньикэ алдьанара-кээһэнэрэ буолунай буоллаҕа. Ону сэргэ дьону кытта үлэ буолан, сарсын эйигин хайдах күн күүтэрин билбэт буоллаҕыҥ. Ол эрээри, суоппар идэтэ умсугутуулаах. Бырайыас терминал нөҥүө төлөнөр буолан абыраллаах. Урут кондуктор барахсан оптуобуһу биир гына хаамар этэ. Сайдыыны кытта тэҥҥэ хардыылыыр туох куһаҕаннаах буолуой?
– Билигин киһи барыта кыра да айдааны төлөпүөҥҥэ устар идэлэннэ. Уустук балаһыанньа үөскээтэҕинэ, хайдах буолаҕын?
– Мин ханнык да балаһыанньаҕа, бастатан туран, холкутук сыһыаннаһарга дьулуһабын. Ханнык да ыгым түгэҥҥэ холку буоллахха, балаһыанньаттан тахсыахха сөп. Дьону кытта, буолаары буолан оптуобуспар тиэйэн иһэр дьоммун кытта кыыһырса сатаабаппын. Дьону кытта үчүгэй сыһыаны олохтуу сатыыбын. Атын суоппардары кытта эмиэ эйэлээх сыһыаннаахпын. Суоппардар хаһан баҕарар ханнык маршрукка үлэлиирбититтэн тутулуга суох, биир идэлээхтэр быһыытынан, уопсай тылы булабыт диэн этиэм этэ.
Ульяна Захарова.