Быйыл Нам улууһугар тыа хаһаайыстыбатынан дьарыктанар бары көрүҥнээх хаһаайыстыбаларга 10513 төбө сүөһү, ол иһигэр 4005 төбө ыанар ынах кыстаан турар.
Олунньу 17 күнүн туругунан 261 ынах төрөөтө, 12170 сылгы баарыттан, төрүөх биэрэ иликтэр. Улууска сүөһү-сылгы кыстыгы хайдах туораан эрэрин билигин этэр эрдэ, кыстык түмүктэниэр диэри икки ыйтан ордук бириэмэ баар.
Бу туһунан улуус дьаһалтатын инстаграмыгар улуустааҕы тыа хаһаайыстыбатын управлениетын салайааччыта Владимир Макаров иһитиннэрдэ:
— Нэһилиэнньэ сайаапкатынан тиийбэт от Забайкальскай кыраайтан тиэллэн кэлэн, хаһаайыстыбаларга түҥэтиллибитэ. Эбии 400 кэриҥэ туонна от, эбии аһылык Амма, Хаҥалас улуустарыттан, Дьокуускай куораттан кэлиэхтээх.
Бүгүҥҥү күн туругунан, улуус 17 нэһилиэгэр «Эрэл» ТХПК үүтү тутар, бородууксуйаны оҥорор пууннарыгар, собуоттарыгар 22 бааһынай хаһаайыстыба үүт туттарар. Быйыл үүтү тутуу хаһааҥҥытааҕар да эрдэ саҕаланна.
«Эрэл» ТХПК ынах төбөтүгэр 35 000 солк. субсидия ылбыт кэтэх хаһаайыстыбалаах дьонтон 1 киилэ үүтү 15 солкуобайга туппут эбит буоллаҕына, 2022 сылтан 20 солкуобай харчыга тутан, үүт закупочнай сыанатын үрдэттэ.
Билигин, ханна да буоларын курдук, коронавируһу утары күүстээх үлэ ыытыллар. Үүт туттарааччылар эрэһиинэ бэрчээккилээх, мааскалаах сылдьаллар, үүтү тутар, астыыр сыахтар «Роспотребнадзор» ирдэбиллэрин толороллор. Ону нэһилиэктэр тыа хаһаайыстыбатын исписэлиистэрэ хонтуруолга туталлар.
Елена ПОТОЦКАЯ, “Саха сирэ” хаһыат, edersaas.ru
Хаартыска: «Нам улууһа” МТ пресс — сулууспата