Бу күннэргэ Красноярскай куоракка саҕаланар Дмитрий Миндиашвили аатынан Тустуу академиятын түһүлгэтин иннинэ Саха сирин сүүмэрдэммит хамаандатын сүрүн тириэньэрэ Владимир Кириллин “Спорт Якутии” кэрэспэдьиэнин ыйытыыларыгар хоруйдаата.
edersaas.ru
Владимир Николаевич, бастатан туран, Миндиашвили академиятын турнирыгар 12 бөҕөстөн турар Саха сирин сүүмэрдэммит хамаандата кыттарын чопчулаата: 57 кг – Арыйаан Тютрин, Петр Копылов, Алексей Копылов уонна Виталий Эспек. 61 кг — Эдуард Григорьев, Петр Павлов, Ньургун Александров итиэннэ Дмитрий Аксенов. 65 киилэлээхтэргэ – Дьулустан Булатов, 70 кг – Тимур Николаев уонна Иван Ефремов, 74 киилэҕэ диэри ыйааһыҥҥа – Герман Устинов. Өссө 14 тустуук бэйэтин үбүнэн уонна спонсордар көмөлөрүнэн Красноярскайга айанныырын эттэ.
Тустууну сэҥээрээччилэр мунаарар боппуруостарыгар хоруйдаан, Виктор Рассадин Миндиашвили академиятын уонна “Иван Ярыгин” турнирдарыгар кыттыбатын иһитиннэрдэ. Ону бөҕөс доруобуйатын туругунан диэн быһаарда.
Владимир Николаевич саха тустууктара “Иван Ярыгин” Гран-при турнирга аччаабыта икки миэстэни ылар иһин киирсиэхтэрэ диэтэ. Онно эбии тэрийээччилэр Арассыыйаттан ыйааһын аайы биэстии киһини киллэрэри көҥүллээбиттэрэ бары хамаандаларга үтүө сонун буолбутун ыйда.
Быйылгыттан Бурятия, Забайкалье курдук күүстээх тустууктардаах регионнар Уһук Илин уокуругар киллэриллибиттэринэн, кулун тутар саҥатыгар Нерюнгригэ ыытыллар түһүлгэҕэ сытыы хапсыһыылар күүтүллэллэрин эттэ. Онтон ол, бастатан туран, бэлэмнэнии хаачыстыбатын үрдээһинигэр сабыдыаллыаҕа диэтэ.
Кулун тутарга Дьокуускайга буолар көҥүл тустууга аан дойду Кубогар Арассыыйа сүүмэрдэммит хамаандатыттан биир эмэ бөҕөспүт кыттыа дуо диэн ыйытыыга, Владимир Николаевич Арыйаан Тютрины сэргэ өссө хас да бөҕөспүт тустуон сөбүн эттэ, Красноярскай түһүлгэлэрин түмүгүттэн элбэх тутулуктаныа диэтэ.
Кэнники кэмҥэ тустууну сэҥээрээччилэртэн өрөспүүбүлүкэ сүүмэрдэммит хамаандатын тириэньэрдэрин аадырыһыгар элбэх кириитикэ киирэрин туһунан ыйытыыга, Владимир Николаевич бары күүһүн ууран, сыратын-сылбатын биэрэн үлэлии сылдьар киһиэхэ кириитикэни истэр бөрүкүтэ суох диэтэ, биир “Аланы” турнир түмүгүнэн барытын сотон кэбиһэр табыллыбатын эттэ. Ол курдук, 2018 сылга саха бөҕөстөрө улахан түһүлгэлэргэ куһаҕана суохтук кыттыбыттарын, Арассыыйа, Европа, устудьуоннар уонна байыаннай сулууспалаахтар ортолоругар аан дойду чөмпүйэнээттэриттэн мэтээллээх эргиллибиттэрин санатта. Саха бөҕөһө аан бастаан 23-гэр диэри саастаахтар ортолоругар аан дойу чөмпүйэнээтигэр боруонса мэтээли ылбытын эттэ. Бүгүҥҥү күҥҥэ биэс бөҕөспүт Арассыыйа сүүмэрдэммит хамаандатыгар баалларын аҕынна.
Роман Попов, edersaas.ru
Хаартыска Интэриниэттэн ылылынна.