Ахсынньы 13-15 күннэригэр Дмитрий Федоров уонна Афанасий Поскачин бириистэригэр уолаттар ортолоругар боксаҕа биирдиилээн бастыыр иһин өрөспүүбүлүкэ таһымнаах турнир буолан ааста. Манна Бүлүү, Үөһээ Бүлүү, Ньурба улуустарыттан уонна Дьокуускай куораттан уопсайа 93 эдэр боксер рингэҕэ таҕыста. Күрэхтэһии 30 ыйааһыҥҥа саастарынан кыра, орто, обургу, улахан оҕолорго бөлөҕүнэн арахсан барда.
Кыайыылаахтарга уонна бириистээх миэстэлэри ылбыт эдэр боксердарга Афанасий Поскачин бириис быһыытынан харчынан сертификат, анал Кубок уонна спортивнай футболкалары туттартаата. Кини биир дойдулаахтара, Хампаттан ИП Архангельскай, ИП Терехов харчынан сертификат туттардылар уонна бириистэринэн спонсордаатылар. Маны сэргэ кыайыылаахтарга Дмитрий Федоров Москватттан ыыппыт боксерскай перчаткалара, кини ийэтэ Христина Николаевна, дьиэ кэргэттэрэ, аймахтара туруорбут анал бириистэрэ туттарылыннылар. Күрэхтэһии «Бастыҥ боксерун» анал аатын ыллылар: Алеша Прудкий, Миша Прудецкай, Эдгард Маныкин (Бүлүү), Эдвард Сидоров(Ньурба); «Бастыҥ техникалаах боксер» – Степан Никитин (Бүлүү) уонна «Кэскиллээх боксер» анал ааты ыллылар: Амир Мусин, Дамир Мусин (Бүлүү), Степан Иннокентьев (Бүлүү).
Николай ПОПОВ, «Саха сирэ» хаһыат, edersaas.ru