СӨ Үөрэҕин уонна наукатын миниистиринэн олорбут Владимир Егоров, бэҕэһээҥҥиттэн СӨ Үүнэр көлүөнэҕэ тус сыаллаах фондатын генеральнай дириэктэринэн ананна. Ити туһунан тус Инстаграмыгар үллэстэр.
“Бүгүҥҥүттэн СӨ Үүнэр көлүөнэҕэ тус сыаллаах фондатын” генеральнай дириэктэринэн үлэбин саҕалаатым. СӨ Ил Дархана Айсен Сергеевич Николаевка уонна Фонд үрдүкү сэбиэтигэр итэҕэллэрин иһин махталбын биллэрэбин”, — диэн Владимир Егоров суруйар. Итиэннэ СӨ бастакы бэрэсидьиэнэ Михаил Николаев тэрийбит уонна үгүс сыллар тухары оҕо, ыччат сайдарыгар усулуобуйаны олохтуур, өрөспүүбүлүкэҕэ стартегическай суолталаах тэрилтэҕэ үлэлиир миэхэ улахан чиэс буолар диэн этэр.
Ханнык баҕарар дуоһунаска өрүү оҕо дьоҕурун уонна талаанын арыйарга, кинилэр сайдыыларыгар усулуобуйа тэрийэн, онтон сиэттэрэн, өрөспүүбүлүкэ бүттүүн социальнай үтүө туруктаныытын ситиһиигэ сорук туруорарым диэн ыйар. Саха сирин педагогическай холбоһугун уонна бииргэ үлэлиир тэрилтэлэрин кытта элбэҕи ситиспиттэрин, өссө даҕаны элбэҕи оҥорор ирдэнэрин суруйар. Саамай сүрүнэ – уопсастыбаннаһы үөрэх уонна наука тула сомоҕолоотубут диэн этэр.
Учууталлар, педагогтар, төрөппүттэр, үөрэнээччилэр бэйэлэрэ, өрөспүүбүлүкэ уонна улуус былааһа, уопсастыбаннас – бары түмсэн эрэгийиэммитигэр национальнай уонна өрөспүүбүлүкэ бырайыактарын, үөрэҕи сайыннарыы стратегическай хайысхатын олоххо киллэрии көдьүүстээх үлэтин олохтоотубут диэн быһаарар.
“Саҥа эппиэтинэстээх дуоһунаска идэлээх эбээһинэспин толорууга бэриниилээхпин уонна СӨ Үүнэр көлүөнэҕэ тус фондатын үлэтэ салгыы сайдарыгар бары кыахпын ууруом”, — диэн Владимир Егоров санаатын этэр. Үөрэх, наука эйгэтигэр бииргэ үлэлээбит кэллиэгэлэригэр, тэрилтэлэргэ махталын биллэрэр.
Людмила ПОПОВА, edersaas.ru