Владимир Егоров: “Оҕо сайдарыгар тэҥ кыаҕы тэрийиэхтээхпит”
“Ил Дархан Айсен Николаев Анал этиитигэр үөрэх систиэмэтин сүрүн бэлиэтин – атыттары кытта тэҥҥэ күөн күрэстэһэр кыахтаах, олохторугар ситиһиилээх исписэлиистэри бэлэмнээн таһаарыахтаахпыт диэн эттэ. Ол инниттэн биһиги оҕо ханна олороруттан тутулуга суох барыларыгар тэҥ кыаҕы биэриэхтээхпит”, — диэн СӨ үөрэҕин уонна наукатын миниистирэ Владимир Егоров үллэһиннэ.
“Саха сирэ” хаһыат, edersaas.ru
Биллэн турар, хас биирдии оҕону сайыннарыы, кини кыаҕын арыйыы сүрүн соругунан буолар. Биһиэхэ маныаха уһуйаан оҕотун талаанын, кыаҕын арыйарга туһаайыллыбыт “Оҕо сайдыытын каартата” туһаныылаах 2015 сылтан “Айдарыылаах оҕо” бырайыак олоххо киирбитэ. Ил Дархан “СӨ үөрэх сайдыытын стратегическай хайысхаларын туһунан” ыйааҕынан биһиги 2021 сылга “Айдарыылаах оҕо” бырайыак тэрээһиннэригэр уһуйааны барытын хабыахтаахпыт. Бэлиэтээн эттэххэ, бу күннэргэ тустаах бырайыак Арассыыйаҕа Оҕо аймах уон сылын иитинэн ыытыллыбыт Стратегическай көҕүлээһин агентствотын куонкуруһугар, дойдуга оскуола иннинээҕи бастыҥ быраактыкатын быһыытынан кыайыылааҕынан ааттанна. Бу Саха сиригэр оскуола иннинээҕи үөрэхтээһин систиэмэтэ хаачыстыбалаах таһымнааҕын өссө төгүл бигэргэтэр. Бу курдук ньыманы орто үөрэх систиэмэтигэр хото туһаныахтаахпыт. Онон, тиһигин быспакка уонна биирдиилээн үөрэтиини хаачыйыахтаахпыт.
Ону таһынан, үөрэх инфраструктуратын тупсарыы үрдүк тэтимин ыһыктыбакка сылдьабыт. Быйыл, уопсайа, 10 оскуола, 24 уһуйаан үлэҕэ киириэҕэ. 2020 сылга Норуоттар икки ардыларынааҕы Арктика оскуолата уонна Наукалар Аччыгый академияларын саҥа үөрэнэр куорпуһа аһыллыахтара. Онно эдэр чинчийээччилэргэ аналлаах аан дойду таһымнаах ураты лабораториялар үлэлиэхтэрэ.
Өрөспүүбүлүкэҕэ үөрэх эйгэтин тус сыаллаах цифровой модела киирэр. Күн бүгүн Саха сирин 229 оскуолатыгар түргэн интэриниэт киирэн турар, 2024 сылга оскуола барыта хааччыллыахтаах. Оскуола аайы оҕо технопааркаларын тэрийиэхтээхпит, билиҥҥитэ өрөспүүбүлүкэ үрдүнэн номнуо 14 баар. Ону тэҥэ, 17 оройуоҥҥа цифровой үөрэх киинин аһыахтаахпыт. Эһиил Ньурбаҕа “IT-куб” цифровой үөрэх киинэ, тыа сиригэр уонна кыра куораттарга олорор оҕолорго “Кванториум” мобильнай технопаарка аһыллыахтара. Быйыл ХИФУ базатыгар Н.Г. Соломонов аатынан коллаборация научнай дьиэтэ – оскуола үөрэнээччилэригэр наука аныгы хайысхаларыгар эбии үөрэхтээһин киинэ тэрилиннэ.
Тыа сирин 38 оскуолатыгар эти-хааны эрчийиинэн уонна спордунан дьарыктанарга усулуобуйа олохтонно.
СӨ Ил Дархана бэлиэтээбитин курдук, быйыл “Үөрэх” национальнай бырайыак “Аныгы оскуола” бырайыагын чэрчитинэн, “Точка роста” цифровой уонна гуманитарнай үөрэх 54 киинэ тэрилиннэ. Оскуолалар материальнай-тиэхиньиичэскэй базаларын тупсаран, саҥардан, хас биирдии оскуолаҕа оҕо аныгы технологияҕа үөрэнэригэр бары усулуобуйаны тэрийэбит.
Бүгүн биһиги үөрэх уонна педагогическай каадыр хаачыстыбатыгар улахан болҕомтону ууруохтаахпыт. Оскуола уонна уһуйаан сүрүн соругун – оҕону хаачыстыбалаах үөрэҕинэн хааччыйыы үлэтин бигэтик тутуһуохтаахпыт.
Ил Дархан СӨ Сомоҕолоһуу сылын биллэриитэ биһигини, күүспүтүн-кыахпытын түмтэ, бу курдук Ил Дархан ыйбыт бары соруктарын быһаарыахпыт.
“Саха сирэ” хаһыат, edersaas.ru